დავით სონღულაშვილი გაეროს მუდმივ კოორდინატორს დიდიე ტრებიუკს შეხვდა

გარემოს დაცვისა და სოფლის მეურნეობის მინისტრი დავით სონღულაშვილი გაეროს მუდმივ კოორდინატორს საქართველოში, დიდიე ტრებიუკს შეხვდა.

სამინისტროს ინფორმაციით, შეხვედრის მიზანს წარმოადგენდა გაეროს კლიმატის ცვლილების ჩარჩო-კონვენციის მხარეთა კონფერენციასთან (COP) დაკავშირებული საკითხების და გარემოსდაცვითი კუთხით ერთობლივი თანამშრომლობის პერსპექტივების განხილვა. მხარეებმა შეხვედრაზე ყურადღებ გაამახვილესა კლიმატის ცვლილებით გამოწვეული რისკების მართვასა და სათბური გაზების ემისიების შემცირებაზე. მსჯელობა ასევე შეეხო ბუნებრივი რესურსების ეფექტიანი მართვის და ერთობლივი გარემოსდაცვითი პროექტების განხორციელების საკითხებს.

„მადლობას მოგახსენებთ მრავალი წლის განმავლობაში გაწეული მხარდაჭერისთვის. გაერთიანებული ერების ორგანიზაციასთან მჭიდრო, პარტნიორული თანამშრომლობა ჩვენთვის განსაკუთრებით ღირებულია. კლიმატის ცვლილებით გამოწვეული გამოწვევების ეფექტიანი დაძლევა და გარემოსდაცვითი დღის წესრიგის წარმატებით განხორციელება სწორედ ერთობლივი ძალისხმევით არის შესაძლებელი“, - განაცხადა დავით სონღულაშვილმა.

გაეროს კლიმატის ცვლილების ჩარჩო-კონვენციის მხარეთა კონფერენცია (COP) გლობალური საზოგადოება კლიმატური გამოწვევების გადასაჭრელად ერთიანდება. კონფერენციის მთავარ მიზანს წარმოადგენს გლობალური დათბობის შეჩერება, პარიზის შეთანხმების მიზნების მისაღწევად ქვეყნებს შორის თანამშრომლობის გაღრმავება, სათბური გაზების ემისიების შემცირება და კლიმატის ცვლილებით გამოწვეული უარყოფითი შედეგების შესარბილებლად ფინანსური თუ ტექნოლოგიური რესურსების მობილიზება.

გარემოს დაცვისა და სოფლის მეურნეობის სამინისტროში გამართულ შეხვედრას მინისტრის პირველი მოადგილე ნინო თანდილაშვილი, გაეროს განვითარების პროგრამის (UNDP) მუდმივი წარმომადგენელი საქართველოში დაგლას უები, გაეროს ბავშვთა ფონდის (UNICEF) წარმომადგენელი იზაბელა კასტროჯოვანი, გაეროს მუდმივი კოორდინატორის ოფისის ეკონომისტი ერიკ ანდერმო და სამინისტროს შესაბამისი სამსახურის ხელმძღვანელი პირები ესწრებოდნენ.