დეკანოზი ალექსანდრე გალდავა: სინდოშიც, სამღვდელოებაში განსხვავებული აზრებია, განსხვავებული ხედვებიც არის, ეს ცუდს არ მოასწავებს

სრულიად საქართველოს კათოლიკოს პატრიარქი შიო III ძლიერი პიროვნებაა, ის კარგი ბერი იყო თავის დროზე, ძალიან სერიოზული და ბეჯითია, - განაცხადა გადაცემაში „იმედი Live” დეკანოზმა ალექსანდრე გალდავამ სრულიად საქართველოს კათოლიკოს-პატრიარქ შიოს III-ზე საუბრისას.

მისივე თქმით, ახალ პატრიარქს უყვარს გუნდური მუშაობის პრინციპი და ისმენს რჩევებს.

„უწმინდესისადმი ღრმა მორჩილება ჰქონდა, რაც ურთულესი რამეა, მორჩილებაში ყოფნა. ძალიან მოყვარულია ადამიანის, არ ეთაკილება კარგი სიტყვის თქმა, შენი საქმიანობის დაფასება“, - განაცხადა დეკანოზმა ალექსანდრე გალდავამ.

დეკანოზი ახალი პატრიარქის არჩევამდე მისი მისამართით გამოთქმულ მწვავე კრიტიკას საშინელებას უწოდებს, თუმცა ამბობს, რომ უწმინდესის გამორჩევით წმინდა სინოდში სიყვარულმა გაიმარჯვა.

„ერთსულოვნებამ უნდა გაიმარჯვოს ჩვენში, მთავარ ფასეულობებზე უნდა ვიყოთ ერთად და დანარჩენი განსხვავებულობა ქმნის საუკეთესოების აღმოჩენას. სინდოშიც, სამღვდელოებაში განსხვავებული აზრებია, განსხვავებული ხედვებიც არის. ეს ცუდს არ მოასწავებს“, - განაცხადა დეკანოზმა ალექსანდრე გალდავამ.