დიდ ბრიტანეთში, აშშ-ის ავიაბაზის სიახლოვეს, ასაფეთქებელი ნივთიერებების უკანონო ფლობის ეჭვით რამდენიმე პირი დააკავეს

ინგლისის დასავლეთით სამართალდამცველებმა რამდენიმე მამაკაცი დააკავეს ფეთქებად ნივთიერებებთან დაკავშირებული დანაშაულის ეჭვით. ინციდენტი მოხდა სამხედრო-საჰაერო ბაზის სიახლოვეს, რომელსაც აქტიურად იყენებენ ამერიკული ძალები.

გლოსტერშირის პოლიციის ცნობით, „მასშტაბური ინციდენტის გამოცხადების“ შემდეგ, სამხრეთ ინგლისში, ველფორდის რაიონში მცხოვრები მოსახლეობის ევაკუაცია განხორციელდა.

სოფელი ველფორდი ფერფორდში მდებარე სამეფო სამხედრო-საჰაერო ძალების ბაზასთან ახლოს მდებარეობს. აღნიშნული ბაზა გამოიყენებოდა ამერიკული B-1 ტიპის ბომბდამშენების მიერ ირანის წინააღმდეგ განხორციელებული ოპერაციების დროს. გარდა ამისა, ის წარმოადგენს აშშ-ის გლობალური დარტყმების სარდლობის ოპერატიულ პოსტს, რომლის ამოცანაც შორ მანძილზე იერიშების მართვაა.

ფერფორდის ბაზაზე განთავსებული აშშ-ის 501-ე საბრძოლო მხარდაჭერის ფრთის წარმომადგენელმა CNN-ს განუცხადა: „ოპერატიული უსაფრთხოებიდან გამომდინარე, ძალების დაცვის კონკრეტულ ზომებს ვერ განვიხილავთ“.

მისივე თქმით, შენაერთი „ინარჩუნებს მაღალ მზადყოფნას და მიიღებს შესაბამის ზომებს ამერიკელი სამხედროების, სამოქალაქო პირების, კონტრაქტორებისა და მათი ოჯახების უსაფრთხოების უზრუნველსაყოფად“.

შემთხვევის ადგილიდან გადაღებულ ფოტოებზე საგანგებო სამსახურების მასშტაბური მობილიზება ჩანს. სააგენტო Reuters-ის მოწმის ცნობით, შეიარაღებული პოლიციელები ავიაბაზის მთავარ შესასვლელს ბლოკავენ.