დიდი ადრონული კოლაიდერი ოთხი წლით გააჩერეს

ბირთვული კვლევების ევროპულმა ორგანიზაციამ (CERN) დიდი ადრონული კოლაიდერის ოთხი წლით გეგმური გაჩერების შესახებ გამოაცხადა. ამ პერიოდის განმავლობაში, რომელსაც CERN-ში Long Shutdown 3-ს (ხანგრძლივი გათიშვა 3) უწოდებენ, კოლაიდერის ტექნიკური მომსახურება და მოდერნიზაცია იგეგმება. სამუშაოების მიზანია კოლაიდერის გარდაქმნა მაღალი სიკაშკაშის მოდერნიზებულ ამაჩქარებლად - HiLumi LHC.

თავდაპირველ კონსტრუქციასთან შედარებით, განახლებულ კოლაიდერს წამში 10-ჯერ მეტი შეჯახების წარმოება შეეძლება, რაც, მეცნიერების ვარაუდით, ბუნების ფუნდამენტური კანონების კვლევის შესაძლებლობებს მნიშვნელოვნად გააფართოებს.

დიდ ადრონულ კოლაიდერს ტექნიკური მომსახურებისა და მოდერნიზაციისთვის რეგულარულად აჩერებდნენ. თუმცა, როგორც CERN-ში უსვამენ ხაზს, Long Shutdown 3-ის განმავლობაში კოლაიდერის ყველაზე მასშტაბური მოდერნიზაცია იგეგმება, 2008 წელს მისი მუშაობის დაწყების შემდეგ.

CERN-ის ინფორმაციით, განახლებული დიდი ადრონული კოლაიდერი ჰიგსის ბოზონის უფრო ზუსტად შესწავლის საშუალებას მოგვცემს - 2012 წელს ამ ნაწილაკის არსებობა სწორედ კოლაიდერის დახმარებით დადასტურდა.

დიდი ადრონული კოლაიდერის მთავარ ამოცანად კვლავ რჩება „ახალი ფიზიკის“ ძიება - იმ მოვლენებისა, რომლებიც სტანდარტული მოდელის ჩარჩოებს სცილდება.