დიპლომატი კოტე ჟღენტი კრისტოფერ ლანდაუს განცხადებაზე: ეს გამოსვლა ძალიან მნიშვნელოვანია და აშშ-ის ოფიციალურ პოზიციას წარმოადგენს

კოტე ჟღენტმა საქართველო-ამერიკის ურთიერთობაზე გადაცემაში „დღის ქრონიკა“ ისაუბრა. პარტია „ერთიანი ნეიტრალურ საქართველოს“ მრჩეველმა, დიპლომატმა ისაუბრა იმაზე, თუ როგორ შეიძლება პარტნიორობის გაღრმავება შტატებთან მიმდინარე პოლიტიკური საკითხებით.

„ძირითადი გზავნილები, რომ ორ ქვეყანას შორის გადაიტვირთოს ურთიერთობები და მათი ნორმალიზაცია მოხდეს და ის, რომ საქართველო ამერიკისთვის საკმაოდ მნიშვნელოვანი ქვეყანა და პარტნიორია ამ რეგიონში - ეს ყველაფერი არა მხოლოდ ამ განცხადებაში [აშშ-ის სახელმწიფო დეპარტამენტის] ჩანს, არამედ სხვა თანმდევ მოვლენებში, თუნდაც დელეგაციების ჩამოსვლაში და ა.შ.“, - აღნიშნა დიპლომატმა.

ჟღენტმა ვაშინგტონის მიერ ბოლო დღეებში გაკეთებული გზავნილები შეაფასა.

„აშშ-ის სახელმწიფო მდივნის მოადგილის, კრისტოფერ ლანდაუს გამოსვლა ჩვენი ელჩის გამოსვლის შემდეგ და თან ასეთ ღონისძიებაზე, ძალიან მნიშვნელოვანია და ეს აშშ-ის ოფიციალურ პოზიციას წარმოადგენს“, - აღნიშნა ჟღენტმა.

აშშ-ის სახელმწიფო მდივნის მოადგილემ, კრისტოფერ ლანდაუმ საქართველოს დამოუკიდებლობის დღისადმი მიძღვნილ ღონისძიებაზე განაცხადა: „ძალზედ მოხარული ვარ, რომ პრეზიდენტმა ტრამპმა საკუთარ ადმინისტრაციაში სხვადასხვა ქვეყანასთან არსებული, რიგ შემთხვევაში წლების განმავლობაში გაყინული, ურთიერთობების გადახედვის თავისუფლება მოგვცა. ვთვლი, რომ ამაში ფასეული შესაძლებლობებია და ვფიქრობ, საქართველო სწორედ ამ რიგშია“.