DW: გერმანიის „სოციალ-დემოკრატებს“ LGBTQ+ ადამიანების დაცვის საკითხის ჩაწერა კონსტიტუციაში სურთ

გერმანიის მმართველ კოალიციაში შემავალმა „სოციალ-დემოკრატიულმა პარტიამ“ (SPD) კვლავ წამოაყენა მოთხოვნა კონსტიტუციის ანტიდისკრიმინაციულ ნორმებში სექსუალური იდენტობის დამატების შესახებ. ინფორმაციას Deutsche Welle ავრცელებს.

გამოცემის ცნობით, ეს ინიციატივა მას შემდეგ გააქტიურდა, რაც ბერლინში LGBTQ+ პრაიდის ღონისძიებების მახლობლად ტერაქტი მოხდა.

ცენტრისტული მემარცხენე SPD-ის თანათავმჯდომარეებმა ბერბელ ბასმა და ლარს კლინგბაილმა, ასევე პარტიის გენერალურმა მდივანმა ტიმ კლუსენდორფმა განაცხადეს, რომ ისინი ამ ცვლილებას „მტკიცედ დააბრუნებენ პოლიტიკურ დღის წესრიგში“.

„ჩვენ გვსურს კიდევ უფრო გავაძლიეროთ „ქვიარ“ ადამიანების პოლიტიკური დაცვა“, - ნათქვამია ერთობლივ განცხადებაში.

როგორც გამოცემა წერს, SPD-ს მსგავსი მოთხოვნა მანამდეც ჰქონდა. პარტია ითხოვდა სექსუალური იდენტობა გერმანიის კონსტიტუციის, ე.წ. ძირითადი კანონის მე-3 მუხლში დამატებულიყო.

ცნობისთვის, გერმანიის კონსტიტუციის მე-3 მუხლი კრძალავს დისკრიმინაციას ისეთი ნიშნებით, როგორიცაა სქესი, წარმომავლობა, ენა, წარმოშობა, რელიგიური მრწამსი და პოლიტიკური შეხედულებები.

მსგავსი მოთხოვნა ორშაბათს მემარცხენე პარტიის ლიდერმა ლუიჯი პანტისანომაც წამოაყენა. მისი თქმით, პარტია მზად არის, დაეხმაროს პარლამენტში საჭირო ორი მესამედის უმრავლესობის უზრუნველყოფას.

გერმანიის კონსტიტუციაში ცვლილებების შესატანად საჭიროა 2/3-ის მხარდაჭერა როგორც ბუნდესტაგში, ისე ბუნდესრატში, ანუ გერმანიის პარლამენტის ორივე პალატაში. თუმცა, კანცლერ ფრიდრიხ მერცის კონსერვატიული ბლოკის, CDU/CSU-ის ხელმძღვანელობით მოქმედ სამთავრობო კოალიციას, საკუთარი ძალებით საკმარისი ხმები არ აქვს.