ეკა სეფაშვილი: ჩინეთთან პარტნიორობა საქართველოსთვის სასარგებლო და პრაგმატულია, სწორედ ამიტომ არ მოსწონთ ეს ჯო უილსონსა და ევრობიუროკრატებს და გვიშლიან ჩინეთთან ურთიერთობას, მაშინ როდესაც თავად ამერიკა მიისწრაფვის ჩინეთთან ურთიერთსასარგებლო ურთიერთობების დამყარებისკენ
პარტია „ხალხის ძალის“ საერთაშორისო ურთიერთობათა მდივანი ეკა სეფაშვილი აცხადებს, რომ ჩინეთთან სტრატეგიული ურთიერთობების განვითარება საქართველოს საგარეო პოლიტიკის დივერსიფიკაციის მნიშვნელოვანი ნაწილია და ამ პროცესის შეფასება პოლიტიკურ ინტერესებთან არის დაკავშირებული.
„თუ ჩინური და ირანული გავლენები არსებობს, პირიქით - მადლობა უნდა ვუთხრათ სახელმწიფო დეპარტამენტს გამოძიებისთვის”-განაცხადა დეპუტატმა და აღნიშნა, რომ აშშ-ის კონგრესში ინიციირებული საკითხები ხშირად საქართველოს ინტერესების საწინააღმდეგო პოლიტიკურ კონტექსტში გამოიყენება, თუმცა მისივე შეფასებით, ნებისმიერი შესაძლო გავლენების კვლევა საგანგაშო არ არის და სიცხადის მიღებას ემსახურება.
„ჩინეთთან საქართველოს სტრატეგიული ურთიერთობა ძალიან მნიშვნელოვანია ჩვენი საგარეო პოლიტიკის დივერსიფიკაციის თვალსაზრისით. ძალიან კარგია, თუ საქართველო რაც შეიძლება მეტ ქვეყანასთან დაამყარებს სტრატეგიულ და ინტენსიურ ეკონომიკურ ურთიერთობებს. იქნება ეს ჩინეთი თუ სხვა რომელიმე ქვეყანა - ეს მხოლოდ და მხოლოდ მისასალმებელია.
ხაზგასასმელია ერთი მომენტი, რასაც ჯო უილსონის განცხადებებიდან და ასევე ევრობიუროკრატების მხრიდან ვისმენთ. ხშირ შემთხვევაში ხდება ისე, რომ რასაც ისინი აკეთებენ, მათთვის კარგია და საქართველოსთვის - ცუდი. ანუ, თუ საქართველოსთვის რაიმე მომგებიანი, ხელსაყრელი და სასურველია, ისინი ამას იწუნებენ. სწორედ ამ ჭრილში განიხილება საქართველო-ჩინეთის ურთიერთობაც. რა თქმა უნდა, ეს საქართველოსთვის კარგი, სასარგებლო და პრაგმატულია, და სწორედ ამიტომ არ მოსწონთ მათ და გვიშლიან ჩინეთთან ურთიერთობას, მაშინ როდესაც თავად ამერიკა მიისწრაფვის ჩინეთთან კარგი და ურთიერთსასარგებლო ურთიერთობების დამყარებისკენ.
რაც შეეხება იმ აქტს, რომელიც წარმომადგენელთა პალატამ ჯო უილსონის მოთხოვნით მიიღო და რომელიც საქართველოში ჩინური გავლენების შესახებ კვლევის მომზადებას ეხება, ეს ნიშნავს, რომ ცდილობენ წარმოაჩინონ, თითქოს ძალიან მძიმე კანონი მიიღეს. თუ ჩავუღრმავდებით, აქ რამდენიმე მნიშვნელოვანი მომენტია, რომელსაც ხაზი უნდა გაესვას.
