Euractiv: ბრიუსელი კანდიდატ ქვეყნებს სთხოვს, ევროკავშირში გაწევრიანებისთვის დონალდ ტრამპის MAGA-თან კავშირები გაწყვიტონ

ევროკავშირის კანდიდატმა ქვეყნებმა აშშ-ის პრეზიდენტის დონალდ ტრამპის მოძრაობა MAGA-თან კავშირები უნდა გაწყვიტონ, რათა ევროკავშირში გაწევრიანდნენ. ინფორმაციას Euractiv-ი გაფართოების საკითხებში ევროკომისარ მარტა კოსზე დაყრდნობით ავრცელებს.

„არ უნდა დავუშვათ, რომ ჩვენი მომავალი წევრები სხვა ძალებზე ისეთ დამოკიდებულებებს ქმნიდნენ, რომლებიც ჩვენს გრძელვადიან ინტერესებს ეწინააღმდეგება“, - განაცხადა გაფართოების კომისარმა კოსმა ბრიუსელში ევროპის პოლიტიკის კვლევების ცენტრის მიერ ორგანიზებულ ღონისძიებაზე.

მისი თქმით, ისტორიაში პირველად გაფართოების პროცესს მოწინააღმდეგეები ჰყავს. კითხვაზე, ვინ არიან ევროკავშირის „მოწინააღმდეგეები“, კოსმა უპასუხა: „ცხადია, ერთ-ერთი მათგანი რუსეთია“.

თუმცა, მისი თქმით, ევროკავშირი ასევე განიცდის „ზეწოლას დასავლეთიდან - MAGA-ს იდეოლოგებისგან, რომლებიც ცდილობენ დაგვარწმუნონ, რომ ჩვენი ევროპული ცივილიზაცია დაღმასვლას განიცდის, ჩვენი ეკონომიკა კლებულობს და ჩვენ სათანადო დემოკრატია არ გვაქვს“.

ეს განცხადებები ტრამპის ადმინისტრაციის მიერ დასავლეთ ბალკანეთის ქვეყნებთან პოლიტიკური და ეკონომიკური კავშირების გაღრმავების მცდელობების ფონზე გაკეთდა, წერს გამოცემა.

Euractiv-ის ცნობით, გასულ წელს ტრამპის ადმინისტრაციის მიერ გამოქვეყნებულმა ეროვნული უსაფრთხოების სტრატეგიამ ევროკავშირი „პოლიტიკური თავისუფლებისა და სუვერენიტეტის“ რყევაში დაადანაშაულა. დოკუმენტში ასევე ნათქვამია, რომ აშშ მხარს დაუჭერს ევროკავშირის წევრ ქვეყნებში მემარჯვენე „პატრიოტულ პარტიებს“, რათა ხელი შეუწყოს „ევროპის ამჟამინდელი კურსის მიმართ წინააღმდეგობას“.

კოსმა ჩინეთი „განსხვავებულ შემთხვევად“ შეაფასა და განაცხადა, რომ პეკინს არ განუხორციელებია ისეთი ტიპის დეზინფორმაციული კამპანიები, როგორსაც მოსკოვი მონტენეგროსა და დასავლეთ ბალკანეთის სხვა კანდიდატ ქვეყნებში აწარმოებდა.

მისი თქმით, ჩინეთი, სანაცვლოდ, ცდილობს კანდიდატ ქვეყნებთან ეკონომიკური კავშირების გაღრმავებას, რათა ევროკავშირში მათი გაწევრიანების შემდეგ ეკონომიკური სარგებელი მიიღოს.

„ჩინეთი გარკვეულწილად ჩვენს კანდიდატ ქვეყნებში იკიდებს ფეხს; შედის ამ ქვეყნებში და ელოდება, რომ ისინი ევროკავშირის წევრები გახდებიან, რადგან როგორც კი ისინი ევროკავშირში გაწევრიანდებიან, მათი კომპანიები ერთიანი ბაზრის ნაწილი გახდებიან“, - განაცხადა კოსმა.

დასავლეთ ბალკანეთში - ევროკავშირის მომავალი წევრი ქვეყნების რეგიონში - აშშ-ის ინვესტიციები დაჩქარდა. ტრამპთან დაკავშირებული კომპანია AAFS ბოსნია და ჰერცეგოვინაში 2 მილიარდ ევროზე მეტი ღირებულების ინვესტიციების განხორციელებას განიხილავს.

სერბეთმა აშშ-სთან საინვესტიციო ექსკლუზიურობის შესახებ შეთანხმებები გააფორმა და იმედოვნებს, რომ ახალი ჰიდროელექტროსადგურის, „ჯერდაპ 3“-ის, მშენებლობას მხოლოდ ამერიკული კომპანიების მონაწილეობით შეძლებს.

ალბანეთში კი საპროტესტო გამოსვლები მოჰყვა სასტუმრო-კურორტის პროექტს, რომელიც დონალდ ტრამპის ქალიშვილთან და სიძესთან არის დაკავშირებული და დაცულ ჭარბტენიან ტერიტორიაზე უნდა განხორციელდეს.

მონტენეგროსაც, რომელიც ევროკავშირში გაწევრიანების ერთ-ერთ ყველაზე მოწინავე კანდიდატად მიიჩნევა, ბოლო თვეებში აშშ-ის ოფიციალური პირები აქტიურად ეხმაურებიან და ქვეყანასთან ურთიერთობების გაღრმავებას ცდილობენ.