Financial Times: გერმანიამ ევროკავშირის ბიუჯეტთან დაკავშირებით ულტიმატუმი წამოაყენა

გერმანიის კანცლერი, ფრიდრიხ მერცი და ევროკავშირის კიდევ ხუთი ლიდერი იმუქრებიან, რომ ბლოკის მომავალ შვიდწლიან ბიუჯეტს მხარს არ დაუჭერენ, ვიდრე „ასობით მილიარდი“ ევროს ოდენობის ხარჯების შემცირება არ იქნება უზრუნველყოფილი, - წერს გამოცემა Financial Times-ი.

ეს ულტიმატუმი ხაზს უსვამს ევროკავშირის შიგნით არსებულ უთანხმოებას ახალ საბიუჯეტო პრიორიტეტებთან დაკავშირებით. დავა ეხება თავდაცვის დაფინანსებასა და ჩინურ თუ ამერიკულ კონკურენციასთან ბრძოლაში მყოფი ინდუსტრიების მხარდაჭერას იმ ფონზე, როდესაც ბლოკი პარალელურად აგრძელებს ფერმერებისა და შედარებით ღარიბი რეგიონების დახმარებას, რომლებიც ტრადიციულად ბიუჯეტის უდიდეს ნაწილს მოიხმარდნენ.

„ევროკავშირის ბიუჯეტი ფუნდამენტურ რეფორმირებას საჭიროებს. ჩვენ არჩევანის გაკეთება მოგვიწევს“, - ნათქვამია გერმანიის, ნიდერლანდების, შვედეთის, დანიის, ავსტრიისა და ფინეთის ლიდერების ერთობლივ წერილში, რომელსაც Financial Times-ი გაეცნო.

„თუ ბიუჯეტი ასობით მილიარდით არ შემცირდება, წელს შეთანხმება ვერ შედგება“, - განაცხადა ერთ-ერთი ხელმომწერი ქვეყნის დიპლომატმა.

ექვსი ქვეყნის ლიდერს რესურსების გაზრდილი ეკონომიკური და უსაფრთხოების გამოწვევებისკენ მიმართვა სურს - კერძოდ, თავდაცვისა და ინოვაციური კომპანიების დაფინანსებაზე. ამის პარალელურად, ისინი ითხოვენ დაფინანსების შემცირებას ფერმერებისა და შედარებით ღარიბი რეგიონებისთვის, რომლებიც ტრადიციულად ევროკავშირის ბიუჯეტის დაახლოებით ორ მესამედს მოიხმარენ.

2028-2034 წლების ბიუჯეტი ევროკავშირის 27-ვე წევრი ქვეყნის ერთსულოვან თანხმობას საჭიროებს. ექვსი ქვეყნის მუქარა, უარი თქვან ბიუჯეტის დამტკიცებაზე, ეწინააღმდეგება ევროკავშირის ლიდერების მიერ ივნისში დადებულ პირობას - შეთანხმებისთვის წელსვე მიეღწიათ, სანამ საფრანგეთში, იტალიაში, ესპანეთსა და პოლონეთში დაგეგმილი არჩევნები მოლაპარაკებების პროცესს შეაფერხებდა.

ბიუჯეტი ძირითადად წევრი ქვეყნების შენატანებით ფინანსდება, სადაც ხელმომწერ ექვს ქვეყანაზე ევროკავშირის საბიუჯეტო შემოსავლების დაახლოებით 40 პროცენტი მოდის. შიდა ხარჯების შემცირების ფონზე, ისინი ევროკომისიის მიერ შეთავაზებული 2-ტრილიონიანი ბიუჯეტის პროექტის არსებით შეკვეცას ითხოვენ.