Financial Times: ირანში მედიკამენტების დეფიციტი მძაფრდება - აშშ-ის სანქციები და ბლოკადა იმპორტს აფერხებს

ირანელი ფარმაცევტები მოსახლეობას მედიკამენტების დეფიციტის გაუარესების შესახებ აფრთხილებენ. მათი თქმით, აშშ-ის ომი და საზღვაო ბლოკადა ქვეყანას მედიკამენტების იმპორტისა და მათთვის თანხის გადახდის შესაძლებლობას უზღუდავს, იუწყება Financial Times-ი.

გამოცემის ცნობით, 90-მილიონიანი მოსახლეობის მქონე ირანი მედიკამენტების უმეტესობას თავად აწარმოებს, თუმცა ნედლეულისთვის, მათ შორის ინდოეთიდან, იმპორტზეა დამოკიდებული. ქვეყანა ასევე მედიკამენტებსა და ვაქცინებს ევროპიდან და სხვა რეგიონებიდან ყიდულობს.

ირანის მინისტრებმა ბოლო კვირებში აღიარეს, რომ საჭირო მარაგების უზრუნველყოფა სულ უფრო რთული ხდება.

აშშ-ის მიერ ირანის სამხრეთ პორტების რამდენიმე თვეა დაწესებული ბლოკადა მედიკამენტების იმპორტისთვის მთავარი საზღვაო მარშრუტის გამოყენებას აფერხებს. ამასთან, გაუქმდა საერთაშორისო ავიარეისები, რომლებითაც ირანში მედიკამენტები და სამედიცინო პროდუქცია შედიოდა. ფრენების გაუქმებას მესამე ქვეყნებში მოქმედი ავიაკომპანიებისა და მომსახურების მიმწოდებლების წინააღმდეგ აშშ-ის მიერ დაწესებული სანქციები უკავშირდება, წერს გამოცემა.

ირანელი ოფიციალური პირების განცხადებით, აშშ-ისა და ისრაელის ინტენსიური დაბომბვის კამპანიის დროს რამდენიმე ფარმაცევტული ქარხანაც პირდაპირ ან ირიბად დაზიანდა.

შექმნილი ვითარების გამო თეირანი მედიკამენტების სტრატეგიული მარაგების გამოყენებასა და იმპორტისთვის ალტერნატიული სახმელეთო მარშრუტების მოძიებას ცდილობს.

ირანის ფარმაცევტთა ასოციაციის წარმომადგენლის, ჰადი აჰმადის განცხადებით, დეფიციტშია სიცოცხლისთვის საშიში დაავადებების სამკურნალო დაახლოებით 60 მედიკამენტი, მათ შორის თალასემიის სამკურნალო პრეპარატები.

„აშშ-ის საზღვაო ბლოკადის პირობებში ქვეყანაში ზღვით ნედლეული, მედიკამენტები ან აუცილებელი აღჭურვილობა არ შემოსულა“, - განაცხადა აჰმადიმ.

ირანის ჯანდაცვის მინისტრმა მოჰამედ რეზა ზაფარგანდიმ მიმდინარე კვირას აღიარა, რომ ეკონომიკური ბლოკადა მედიკამენტების მიწოდების ჯაჭვს არღვევს.

„მიუხედავად იმისა, რომ ოფიციალურად აცხადებენ, თითქოს მედიკამენტებზე სანქციები არ ვრცელდება, უცხოურ ვალუტაში გადარიცხვებსა და გადაზიდვებზე დაწესებული შეზღუდვები მიწოდებას აფერხებს“, - განაცხადა მინისტრმა.

აშშ აცხადებს, რომ მედიკამენტები სანქციებისგან გათავისუფლებულია. თუმცა, ანალიტიკოსების შეფასებით, ბლოკადის პირობებში დეფიციტი უკვე რამდენიმე თვეა მძაფრდება და ფარმაცევტულ პროდუქტებზე გავლენას ახდენს ასევე ვაშინგტონის მცდელობა, ირანთან საჰაერო მიმოსვლა შეზღუდოს.

აშშ-ის ეს კამპანია ირანზე ზეწოლის ნაწილია, რათა თეირანმა ჰორმუზის სრუტე ხელახლა გახსნას და ბირთვულ პროგრამასთან დაკავშირებით შეთანხმებას მიაღწიოს, იუწყება Financial Times-ი.