განათლების ხარისხის განვითარების ეროვნულმა ცენტრმა მოლდოვაში ევროპის საბჭოს მხარდაჭერით გამართულ სამუშაო შეხვედრაში მიიღო მონაწილეობა

განათლების ხარისხის განვითარების ეროვნულმა ცენტრმა მოლდოვაში, ქალაქ კიშინიოვში, ევროპის საბჭოსა და მოლდოვის განათლებისა და კვლევის სამინისტროს ერთობლივ ღონისძიებაში მიიღო მონაწილეობა.

ცენტრის ინფორმაციით, სამუშაო შეხვედრის ძირითად თემებს წარმოადგენდა - ლტოლვილების უმაღლეს განათლებასა და შრომის ბაზარზე მონაწილეობის მხარდაჭერას და ლტოლვილთა ევროპული კვალიფიკაციების პასპორტის (EQPR) დანერგვასთან დაკავშირებულ საკითხებს.

ღონისძიებას ესწრებოდნენ ევროპის სხვადასხვა ქვეყნის სახელმწიფო უწყების 100-ზე მეტი დელეგატი, მათ შორის: უნივერსიტეტებისა და ეროვნული საინფორმაციო ცენტრების ევროპული ქსელის (ENIC-NARIC) წარმომადგენლები. შეხვედრის მონაწილეებს, ლისაბონის აღიარების კონვენციის კომიტეტის თავმჯდომარემ, საინფორმაციო ცენტრების ევროპული ქსელის პრეზიდენტმა და UNHCR-ის წარმომადგენელმა წარუდგინეს ანალიზი ევროპაში ლტოლვილების ინტეგრაციის ხელშეწყობის მექანიზმების შესახებ.

სამუშაო შეხვედრაზე ყურადღება გამახვილდა ლტოლვილების კვალიფიკაციების აღიარებასთან დაკავშირებულ გამოწვევებზე, კერძოდ ისეთ შემთხვევებზე, როდესაც ლტოლვილთა განათლების დამადასტურებელი დოკუმენტაცია აღიარების მიზნებისთვის არასრულად არის წარმოდგენილი ან შეუძლებელია მათი მოძიება.

აღნიშნულ ღონისძიებაზე, საქართველოს, სომხეთის, იტალიის, ლატვიისა და პოლონეთის წარმომადგენლების მიერ ლტოლვილთა ევროპული კვალიფიკაციების პასპორტის მეთოდოლოგიის მიხედვით 29 ლტოლვილის სტატუსის მქონე პირის კვალიფიკაციის შეფასება განხორციელდა.

ცენტრი აქტიურად აგრძელებს ეროვნული საინფორმაციო ცენტრების ევროპული ქსელის (ENIC-NARIC) ფარგლებში გამართულ სამუშაო შეხვედრებში მონაწილეობას.