გენადი არველაძე და ინგა ფხალაძე არაბთა გაერთიანებული საამიროების სახელმწიფო მინისტრს და მის თანმხლებ ბიზნეს დელეგაციას შეხვდნენ
ეკონომიკისა და მდგრადი განვითარების მინისტრის მოადგილეები გენადი არველაძე და ინგა ფხალაძე არაბთა გაერთიანებული საამიროების საგარეო საქმეთა სახელმწიფო მინისტრს, საიდ ბინ მუბარაქ ალ ჰაჯერის შეხვდნენ, რომელიც საქართველოს კერძო სექტორის წარმომადგენლობითი დელეგაციით ეწვია, - ინფორმაციას საქართველოს ეკონომიკისა და მდგრადი განვითარების სამინისტრო ავრცელებს.
უწყების ცნობით, შეხვედრაზე მხარეებმა ორ ქვეყანას შორის არსებულ კავშირებზე და ამ ურთიერთობების კიდევ უფრო გაღრმავებაზე იმსჯელეს. აქცენტი გაკეთდა თანამშრომლობაზე განახლებადი ენერგეტიკის, ტრანსპორტის, ლოგისტიკის, ტურიზმის სფეროებში. მხარეებმა ასევე ისაუბრეს სასურსათო უსაფრთხოების კუთხით ქართული საექსპორტო პროდუქციის არაბთა გაერთიანებულ საამიროებში ექსპორტის ზრდასთან დაკავშირებით.
„შეხვედრაზე აქცენტი გაკეთდა საქართველოზე, როგორც გლობალურად მიმზიდველ საინვესტიციო გარემოზე. გენადი არველაძე მიესალმა თბილისში Eagle Hills Georgia-ს ოფისის გახსნას და აღნიშნა, რომ კომპანიის მასშტაბური პროექტები ქვეყნის განვითარების ახალ, ისტორიულ ეტაპს ჩაუყრის საფუძველს.
შეხვედრაზე მხარეები შეთანხმდნენ, რომ ორი ქვეყნის საჯარო და კერძო სექტორების ჩართულობით ჩამოყალიბდება საინვესტიციო პროექტების განხილვის ქმედითი მექანიზმი, რომელიც ხელს შეუწყობს საქართველოსა და არაბთა გაერთიანებული საამიროების თანამშრომლობას ინვესტიციების მოზიდვისა და ახალი პროექტების განხორციელების მიმართულებით.
შეხვედრას ასევე დაესწრნენ საქართველოს რკინიგზის გენერალური დირექტორი ლაშა აბაშიძე და საქართველოს ელჩი არაბთა გაერთიანებულ საამიროებში გიორგი ჯანჯღავა“, - აღნიშნულია გავრცელებულ ინფორმაციაში.