გიორგი ჩაკვეტაძე გვარამია-ჯაფარიძისა და ნორვეგიის ელჩის ფარულ შეხვედრაზე: საზოგადოებას აქვს სრული უფლება, ჰქონდეს ინფორმაცია მსგავს შეხვედრებზე. ამ ე.წ. ოპოზიციონერების ვალდებულებაც კი არის, რომ განმარტონ, რატომ იყო საჭირო მსგავსი დახურული, ფარული შეხვედრა, რომელიც საზოგადოებამ შემთხვევით გაიგო

საერთაშორისო აქტორების მხარდაჭერითა და ჩართულობით წლების განმავლობაში ადგილობრივი რადიკალური ჯგუფები იყვნენ წახალისებული, - განაცხადა განათლების, მეცნიერებისა და ახალგაზრდულ საქმეთა კომიტეტის თავმჯდომარის პირველმა მოადგილემ გიორგი ჩაკვეტაძემ გვარამია-ჯაფარიძისა და ნორვეგიის ელჩის ფარულ შეხვედრასთან დაკავშირებით.

მისივე თქმით, როგორც ჩანს ოპოზიციას დასამალი აქვს ის ზრახვები და გეგმები, რომლებიც ჯერ კიდევ შენარჩუნებულია.

„საზოგადოებას აქვს სრული უფლება ჰქონდეს ინფორმაცია მსგავს შეხვედრებზე. ამ ე.წ. ოპოზიციონერების ვალდებულებაც კი არის, რომ განმარტონ, რატომ იყო საჭირო მსგავსი დახურული, ფარული შეხვედრა, რომელიც საზოგადოებამ შემთხვევით გაიგო“, - აღნიშნა ჩაკვეტაძემ.

„ქრონიკის“ ექსკლუზიური ინფორმაციით, ნიკა გვარამია და ზურა ჯაფარიძე ნორვეგიის ელჩს ფარულად შეხვდნენ. როგორც ირკვევა, ინიციატორი თავად დიპლომატი იყო.