გიორგი გაბუნია: გვარამიაზე მეტი „ნაცი“ ვინ არის „ნაციონალურ მოძრაობაში“?! - მათ ჩათვალეს, რომ სააკაშვილი დასრულებულია მათთვის, როგორც ლიდერი. ახლა ცდილობენ, რომ საზოგადოებაში ერთგვარი წამყვანი ლიდერის როლი აჩვენონ

გვარამიაზე მეტი „ნაცი“ ვინ არის „ნაციონალურ მოძრაობაში“?!, - განაცხადა საქართველოს პარლამენტის კულტურის კომიტეტის თავმჯდომარემ, გიორგი გაბუნიამ ნიკა გვარამიას მიერ სოციალურ ქსელში გამოქვეყნებული პოსტის კომენტირებისას.

„რეალურად, მათ წლების განმავლობაში ჰქონდათ მცდელობა, ჩამოყალიბებულიყვნენ, სხვადასხვა გუნდად გაშლილიყვნენ, მაგრამ იდეოლოგიურად, ღირებულებებით, არსითა და შინაარსით, ეს ადამიანები არიან „ნაციონალური მოძრაობის“ იდეის გამტარებლები.

გარკვეულწილად, მათ ჩათვალეს, რომ სააკაშვილი დასრულებულია მათთვის, როგორც ლიდერი. ახლა ცდილობენ, რომ საზოგადოებაში ერთგვარი წამყვანი ლიდერის როლი აჩვენონ და პოზიციები გაიმყარონ „ნაციონალური მოძრაობის“ იმ ნარჩენებში, რა ნარჩენებიც დღეს შემორჩათ“, - აღნიშნა გაბუნიამ.

ოპოზიციაში არსებული კრიზისი ღრმავდება, ნიკა გვარამიას სამიზნე იაგო ხვიჩიასთან ერთად ისევ სააკაშვილი და „ნაციონალური მოძრაობაა“. გვარამიას მიაჩნია, რომ პარტია რეპუტაციას ვერ აღიდგენს და მათ საკუთარი თავი თავად დაიზიანეს. გვარამიას ასევე ფიქრობს, რომ იაგო ხვიჩია „ნაცმოძრაობის“ დაშლისთვის მუშაობს.