გიორგი გაბუნია: მოლოდინი მაქვს, რომ უახლოეს მომავალში პრემიერი კულტურის მინისტრის ახალ კანდიდატურას წარადგენს. მზად ვართ ახალ მინისტრთან ვიმუშაოთ იმ პრობლემების გადაჭრაზე, რა პრობლემებიც და გამოწვევებიც ჩვენს სფეროში არსებობს

მოლოდინი მაქვს, რომ უახლოეს მომავალში პრემიერი კულტურის მინისტრის ახალ კანდიდატურას წარადგენს, - განაცხადა გადაცემაში „დღის ქრონიკა“ პარლამენტის კულტურის კომიტეტის თავმჯდომარემ და საზოგადოება „ქართულის“ ლიდერმა გიორგი გაბუნიამ.

მისი თქმით, პარლამენტი, კულტურის კომიტეტი მზად არის იმისთვის, რომ ახალ მინისტრთან ყველა იმ პრობლემის გადაჭრაზე იმუშაოს, რა პრობლემებიც და გამოწვევებიც კულტურის სფეროში არსებობს.

„ვიცით, რომ კულტურის მინისტრის მოვალეობას ასრულებს ბატონი მიხეილ კიკნაძე. ერთმანეთთან ყოველდღიურ კონტაქტზე ვართ. რა თქმა უნდა, კულტურის სამინისტროს სჭირდება ახალი ხელმძღვანელი. ძალიან მნიშვნელოვანი ბევრი საკითხია, ბევრი გამოწვევაა, რომელიც უნდა დაიძლიოს. მზად ვართ ახალ მინისტრთან კომუნიკაციისთვის, იმისთვის, რომ ერთობლივად ვიმსჯელოთ და ვიმუშაოთ იმ მიმდინარე საკითხებზე, რომლებიც ჩვენთვის აქტუალური და მნიშვნელოვანია. ასევე, რა თქმა უნდა, კულტურას სჭირდება პროფესიონალი ადამიანი, მაღალი კვალიფიკაციის ადამიანი, ვინც სისტემას, დარგს კარგად იცნობს. კულტურა ძალიან მგრძნობიარე, ძალიან მრავალფეროვანი და სენსიტიური სივრცეა, სადაც კრიტიკულად მნიშვნელოვანია გვყავდეს ღირსეული, მაღალი კვალიფიკაციას კადრი. მოლოდინი მაქვს, რომ უახლოეს მომავალში პრემიერი მინისტრის ახალ კანდიდატურას წარადგენს. მზად ვართ იმისთვის, რომ ახალ მინისტრთან ვიმუშაოთ იმ პრობლემების გადაჭრაზე, რა პრობლემებიც და გამოწვევებიც ჩვენს სფეროში არსებობს“, - აღნიშნა მან.