გიორგი კახიანი გაეროს გენერალურ ასამბლეაზე: ეს არის უმაღლესი საერთაშორისო ტრიბუნა, რომელსაც უყურებს მთელი საერთაშორისო თანამეგობრობა. ბუნებრივია, ამ ტრიბუნიდან წარმოთქმული ყოველი გზავნილი ყველგან ისმინება და განსაკუთრებული დატვირთვა აქვს

რამდენიმე საათი დარჩა პრემიერის გამოსვლამდე გაეროს გენერალურ ასამბლეაზე და მართლაც უდიდესია ამ ტრიბუნის მნიშვნელობა, - განაცხადა გადაცემაში „იმედი Live” პარლამენტის თავმჯდომარის მოადგილე გიორგი კახიანმა.

მისი თქმით, გაეროს გენერალურ ასამბლეას თვალს ადევნებს მთელი საერთაშორისო თანამეგობრობა, რაც მის მნიშვნელობას განსაზღვრავს.

„ეს არის უმაღლესი საერთაშორისო ტრიბუნა, რომელსაც უყურებს მთელი საერთაშორისო თანამეგობრობა, ამ გამოსვლას ესწრებიან მსოფლიო ლიდერები და ბუნებრივია, ამ ტრიბუნიდან წარმოთქმული ყოველი გზავნილი ყველგან ისმინება და განსაკუთრებული დატვირთვა აქვს. ისეთი საკითხები, როგორიც არის ქვეყნის დეოკუპაცია, ჩვენი უმთავრესი გამოწვევა, იმავდროულად დეოკუპაციის გზა, ასეთ საკითხებზე იქნება ლაპარაკი. საუბარი იქნება ეკონომიკურ პროცესებზე, რომელმაც მაღალი ეკონომიკური ზრდა მოგვცა ბოლო წლების განმავლობაში. ბოლო 5 წლის განმავლობაში 9,3%-იანი ეკონომიკური ზრდა იგულისხმება. ასეთი ეკონომიკური ზრდა არა მხოლოდ რეგიონში, ევროკავშირის ქვეყნებშიც არავის აქვს. გარდა ამისა, საუბარი იქნება იმ სტრატეგიულ პროექტებზე, რომლებიც ჩვენი ქვეყნის დაკავშირებადობის ფუნქციის გაზრდას ემსახურება“, - განაცხადა გიორგი კახიანმა.

პარლამენტის ვიცე-სპიკერი გაეროს გენერალურ ასამბლეაში პრემიერის შეხვედრებს და თემატურ დისკუსიებში მონაწილეობასაც შეეხო. ამ კონტექსტში მან ევროკავშირთან ურთიერთობების შესაძლო გაუმჯობესებაზეც ილაპარაკა.

„მე ვფიქრობ, რომ გარღვევას ნამდვილად უნდა ველოდოთ. არამხოლოდ გაეროს ასამბლეაში მონაწილეობა, არამედ, ზოგადად, პროცესები, რომელთაც ბოლო პერიოდში თვალს ვადევნებთ, ამის საფუძველს იძლევა. პროცესი, რომელიც ჩვენგან დამოუკიდებელი მიზეზის გამო და სრულიად უსამართლოდ მიმდინარეობდა, გაყინული პროცესი, ვფიქრობ, მიდის იქით, რომ ეს ურთიერთობების უნდა აღდგეს, რაც მთავარია, ამას თავად ხვდებიან“, - განაცხადა გიორგი კახიანმა.