გიორგი სოსიაშვილი: ევრობიუროკრატებს უნდა ახსოვდეთ, რომ ჩვენი ქვეყანა არ არის ხელწამოსაკრავი სახელმწიფო

ევრობიუროკრატებს უნდა ახსოვდეთ, რომ ჩვენი ქვეყანა არ არის ხელწამოსაკრავი სახელმწიფო და უნდა გადახედონ ჩვენს ისტორიას. გუშინ არ დაბადებულა ჩვენი სახელმწიფო, ტრადიციები და ჩვენი სახელმწიფოებრიობა. თავისთავად ცხადია, უნდა გაუფრთხილდნენ ამ ურთიერთობას, - განაცხადა პარლამენტის განათლების, მეცნიერებისა და ახალგაზრდულ საქმეთა კომიტეტის თავმჯდომარის მოადგილემ გიორგი სოსიაშვილმა გადაცემაში „დღის ქრონიკა“.

მისი თქმით, საქართველოს ევროკავშირში გაწევრიანება უნდა ეფუძნებოდეს პატივისცემასა და სუვერენიტეტის აღიარებას.

„როგორ წარმოგიდგენიათ, რომ საქართველოს საელჩომ რომელიმე სხვა ქვეყანაში დააფინანსოს რადიკალების კლიპი, რადიკალთა კონცერტების ჩატარება? ხომ წარმოგიდგენიათ, რა რეაქცია მოჰყვება მთელი ევროკავშირის წარმომადგენლებისაგან. შესაბამისად, აქ როგორ წარმოუდგენიათ?! ახსნა-განმარტება აუცილებლად მოუწევს ევროკავშირის ელჩს, ვინაიდან პირდაპირ დააფინანსეს კონცერტი იმ ადამიანის, რომელიც გამოირჩეოდა თავისი მძაფრი განცხადებებით და საქართველოს მოსახლეობის ნახევარზე მეტს აგინებდა და პირდაპირ სიმღერებს უწერდა ქუჩა-ქუჩა მყოფ ამ რადიკალებს. ეს არის წარმოუდგენელი ამბავი.

ჩვენთვის ევროკავშირი და ზოგიერთი ევროპელი ბიუროკრატი ერთი და იგივე არ არის. ჩვენი მთავარი გზა არის ევროკავშირში გაწევრიანება. ეს არის ჩვენი ბუნებრივი, ისტორიული არჩევანი, მაგრამ ეს არ უნდა გავაიგივოთ დღეს არსებულ ზოგიერთი ბიუროკრატის ქცევებთან.

მე პირადად, როგორც ერთი რიგითი ქართველი, ვგმობ ზოგიერთი ევროპელი პოლიტიკოსის განცხადებებს. მათ უნდა ახსოვდეთ, რომ ჩვენი ქვეყანა არ არის ხელწამოსაკრავი სახელმწიფო და უნდა გადახედონ ჩვენს ისტორიას. გუშინ არ დაბადებულა ჩვენი სახელმწიფო, ტრადიციები და ჩვენი სახელმწიფოებრიობა. თავისთავად ცხადია, უნდა გაუფრთხილდნენ ამ ურთიერთობას. ჩვენი გაწევრიანება უნდა ეფუძნებოდეს პატივისცემას, სუვერენიტეტის აღიარებას და ამ ყველაფრის შემდეგ შესაძლებელი იქნება საუბარი“, – განაცხადა სოსიაშვილმა.