გიორგი სოსიაშვილი ხოშტარიაზე: პირდაპირ პროვოკაციებზე მიდიოდა, რომ როგორღაც ციხეში შესულიყო და გამხდარიყო ელენე წამებული

გიორგი სოსიაშვილი ელენე ხოშტარიას ჯანმრთელობის მდგომარეობის შესახებ ქვეყნის შიგნით თუ გარეთ აგორებულ დეზინფორმაციულ კამპანიას ეხმიანება. განათლების, მეცნიერებისა და ახალგაზრდულ საქმეთა კომიტეტის თავმჯდომარის მოადგილე აღნიშნავს, რომ „ქართულმა ოცნებამ“ სასჯელაღსრულების დაწესებულებებში „ნაციონალური მოძრაობის“ მმართველობისგან სრულიად განსხვავებული პირობები შექმნა.

„ადამიანი ძალით იწევდა ციხეში, წამებულის გვირგვინი რომ დაედგა და პირდაპირ პროვოკაციებზე მიდიოდა, რომ როგორღაც ციხეში შესულიყო და გამხდარიყო ელენე წამებული. მათ ავიწყდებათ, რომ ჩვენმა ხელისუფლებამ საერთოდ სხვა სტანდარტები შექმნა სასჯელაღსრულების დაწესებულებებში და საერთოდ სხვა მოპყრობა ადამიანებისადმი, განსხვავებით მათგან, რომლებიც წამებაში სულს ხდიდნენ ადამიანებს. ასეთი სიცრუეები აღარ იყიდება“, - ამბობს სოსიაშვილი.

ბრალდებების საპასუხოდ, პენიტენციურმა სამსახურმა განმარტება გამოაქვეყნა. მასში ნათქვამია, რომ მსჯავრდებული უზრუნველყოფილია ყველა სამედიცინო სერვისით. მას დიაგნოზის აბსოლუტური უმეტესობა, დადგენილი ჰქონდა დაწესებულებაში შეყვანამდე და ქრონიკული დაავადებები პერიოდულად მწვავდება, თუმცა ხოშტარიას გართულებები არ აქვს.