გიორგი ვოლსკი: სისტემური დანაშაულია, რომ გამოვა ხელისუფალი ტრიბუნასთან და იტყვის - არავითარი მოწყალება და არავითარი ტყვიის დაზოგვა, ყველა უნდა დაიხოცოს, ვინც სახელმწიფოს დაუპირისპირდება. ასეთი პერიოდი გვახსოვს

რასაკვირველია, სისტემური დანაშაული არ არის. სისტემური დანაშაულია, რომ გამოვა ხელისუფალი ტრიბუნასთან და იტყვის - არავითარი მოწყალება და არავითარი ტყვიის დაზოგვა, ყველა უნდა დაიხოცოს, ვინც სახელმწიფოს დაუპირისპირდება. ასეთი პერიოდი გვახსოვს, - განაცხადა გიორგი ვოლსკიმ გორში მომხდარ ინციდენტზე საუბრისას.

პარლამენტის პირველმა ვიცე-სპიკერმა აღნიშნა, რომ ხისტი ძალია გამოყენება დასაშვებია მაშინ, როცა სახელმწიფოს საფრთხე ემუქრება, თუმცა მისივე თქმით, გორში მომხდარი ფაქტი შეუფერებელია იმ სისტემისთვის, რომელსაც სახელმწიფო აშენებს.

„ხისტი ძალა შეიძლება გამოიყენეს პოლიციელმა, როცა სახელმწიფოს საფრთხე ემუქრებოდა, მაგრამ ადამიანის გვერდზე გაყვანა და მისი ცემა, რასაკვირველია, შეუფერებელია იმ სისტემისთვის, რომელსაც ვაშენებთ უკვე დიდი ხანია“, - განაცხადა ვოლსკიმ.

საქართველოს პროკურატურამ სამსახურებრივი უფლებამოსილების ძალადობით გადამეტების ფაქტზე 6 პოლიციელი დააკავა.