გიტანას ნაუსედას განცხადებით, რუსეთმა შესაძლოა ლიეტუვის კრიტიკულ ინფრასტრუქტურას დაარტყას

ლიეტუვის პრეზიდენტი გიტანას ნაუსედა აცხადებს, რომ რუსეთმა შესაძლოა ქვეყნის კრიტიკულ ინფრასტრუქტურაზე თავდასხმები მიიტანოს. ამის გამო ლიეტუვამ კრიტიკული სატრანსპორტო და ენერგეტიკული ინფრასტრუქტურის დაცვა გააძლიერა.​ ნაუსედას თქმით, საფრთხის შესახებ სადაზვერვო სამსახურმა აცნობა.

„ჩვენ გვაქვს ასეთი სიგნალები, რომლებსაც ჩვენი [სადაზვერვო] სამსახურებიდან ვიღებთ. ისინი მკაფიოდ არ განსაზღვრავენ ადგილს ან დროს... ვინაიდან მოწინააღმდეგეს დაგეგმვის პროცესი ბოლომდე არ მიუყვანია და ჩვენ მხოლოდ თავად დაგეგმვის ან საბოლოო მიზნის შესახებ ვიცით. ეს შეიძლება იყოს სხვადასხვა საშუალება, რომელიც მიზნად ისახავს კრიტიკული ინფრასტრუქტურის ფიზიკურ დაზიანებას... ნებისმიერი რამ, რაც ამ ობიექტების ფუნქციონირებას შეაჩერებს“, - განაცხადა მან.

ლიეტუვის პრეზიდენტის შეშფოთებას იზიარებს ლატვიის ლიდერიც. ედგარს რინკევიჩი ადასტურებს სადაზვერვო ინფორმაციას, რომ რუსეთი შესაძლოა ბალტიის ქვეყნებსა და პოლონეთში, ნატოს ერთიანობის გამოცდის მიზნით, პროვოკაციებს ამზადებს.

კრემლში ამ განცხადებებს მილიტარიზაციის გამართლების მიზნით ალიანსის წევრების დაშინების მცდელობა უწოდეს.