გივი მიქანაძე: საერთაშორისოდ აღიარებულმა შვეიცარიულმა კომპანიამ დადო დასკვნა, რომ სასკოლო უნიფორმები, რომელსაც აწარმოებს ეს კონკრეტული ჩინური კომპანია, აბსოლუტურად სრულ თავსებადობაშია იმ სტანდარტებთან, რომელიც სასკოლო ცხოვრებაში გამოიყენება

ისეთ ქვეყნებში, სადაც სასკოლო ფორმა არ არის შემოღებული, ბულინგის ერთ-ერთი მთავარი კომპონენტი არის ჩაცმულობა, რომელიც ქმნის ორ პრობლემას, პირველი არის ის, რომ ბავშვი სოციუმიდან გარიყულია. მეორე პრობლემა არის ის, რომ ბავშვი ამ ყველაფერში ადანაშაულებს მშობელს, რადგან მშობელი ვერ უზრუნველყოფს ბავშვის მდგომარეობას ისე, რომ მას ყოველკვირეულად ახალი ჩაცმულობა ჰქონდეს, - განაცხადა გადაცემაში „ღია ეთერი“ განათლების, მეცნიერების და ახალგაზრდობის მინისტრმა გივი მიქანაძემ სასკოლო ფორმის რეფორმაზე საუბრისას.

მისივე თქმით, შედეგი არის ის, რომ ბავშვი სასკოლო ცხოვრებიდანაც გათიშულია და ოჯახშიც პრობლემები იჩენს თავს.

„ჩვენ გადავწყვიტეთ, რომ ფორმის შემოღება დავიწყოთ დაწყებითი კლასებიდან და წელს, როდესაც მეექვსე კლასელი ჩაიცვამს ფორმას და შეეჩვევა ამ ფორმის კულტურას, შემდეგ წელიწადს ჩვენ უკვე ბრძანებაში ცვლილებას შევიტანთ და ვიტყვით, რომ 2027-2028 სასწავლო წელს სასკოლო ფორმა გავრცელდება პირველიდან- მეშვიდე კლასის ჩათვლით, 2028-2029 წელს პირველიდან- მერვე კლასის ჩათვლით. ასე ჩვენ რამდენიმე წელიწადში უმტკივნეულოდ, ფორმის კულტურას შემოვიტანთ სკოლაში და შესაძლებელია, რომ ზოგიერთ სკოლაში უფრო მალევე მოხდეს ყველა კლასში დანერგვა“, - აღნიშნა მინისტრმა.

გივი მიქანაძემ დეტალურად განმარტა ფორმების ხარისხთან დაკავშირებული დეტალები.

„კონკრეტულმა ადამიანებმა და ჯგუფებმა ვერაფერი რომ ვერ მოიგონეს, მოიფიქრეს ის, რომ თითქოს ხარისხია დაბალი, რაღაც სტანდარტს არ ექვემდებარება და პოლიესტერი თურმე ჯანმრთელობისთვის დამაზიანებელი ყოფილა. ნებისმიერი გადაწყვეტილება, რასაც ვიღებთ, წინასწარ არაერთხელ გვაქვს ნაფიქრი, ვიმსჯელეთ ამ ყველაფერზე, ვნახეთ საერთაშორისო პრაქტიკა და ა.შ.

კომპანია, რომელმაც გაიმარჯვა ბაზრის კვლევაში, არის არა მხოლოდ ჩინეთში, არამედ მსოფლიო ბაზარზე ერთ-ერთი წამყვანი კომპანია სასკოლო ფორმების შეკერვასთან დაკავშირებით. ეს კომპანია თანამშრომლობს ბრიტანულ კომპანიებთან და არსებობს საერთაშორისოდ აღიარებული, შვეიცარიული კომპანიის დასკვნა, რომელსაც აქვს 115 ქვეყანაში 2500 ლაბორატორია. ამ კომპანიამ დადო დასკვნა, რომ სასკოლო უნიფორმები, რომელსაც აწარმოებს ეს კონკრეტული ჩინური კომპანია, აბსოლუტურად სრულ თავსებადობაშია იმ სტანდარტებთან, რომელიც სასკოლო ცხოვრებაში გამოიყენება“, - დასძინა გივი მიქანაძემ.