გორდონ კიოლერი: ბევრი მაგალითია, რომ არსებული პოლიტიკური ზეწოლის ფონზე, სამართლებრივი სასჯელის შიში გაუჩნდათ სრულიად კანონმორჩილ მოქალაქეებს, ეს ადამიანები დაფიქრდნენ, უღირთ მათ თუ არა AfD -ს საჯაროდ მხარდაჭერა

ბევრი მაგალითია, რომ არსებული პოლიტიკური ზეწოლის ფონზე, სამართლებრივი სასჯელის შიში გაუჩნდათ სრულიად კანონმორჩილ მოქალაქეებს, ეს ადამიანები დაფიქრდნენ, უღირთ მათ თუ არა AfD -ს საჯაროდ მხარდაჭერა, - განაცხადა გადაცემაში „იმედის კვირა“ „ალტერნატივა გერმანიისთვის“ (AfD)-ს საპარლამენტო ფრაქციის თავმჯდომარის მოადგილემ გორდონ კიოლერმა AfD-ს აკრძალვის მცდელობაზე საუბრისას.

მისივე თქმით, საჯარო სამსახურებში დასაქმებულები მათ მხარდამჭერებსაც ავიწროებენ, პრობლემებს უქმნიან და ამის შესახებ ინფორმაციას ეს ადამიანები თავად ატყობინებენ.

„მეკლენბურგის რეგიონში მერცის პარტია ბარიერს თუ გადალახავს არავინ იცის, ბერლინში კი, არა მგონია 20% გადასცდნენ, ამ პოლიტიკური ძალების დრო წასულია. მერცის პარტიას ჩვენი ეშინია, რადგან იციან, რომ პოლიტიკურ სამარეში გავისტუმრებთ.

ჩვენი პოლიტიკური ძალის პოლიტიკური იზოლაცია უკვე შეუძლებელია.

ბუნებრივია, რომ ჩვენი გამარჯვება ევროკავშირს გულზე მოხვდა. ამ საარჩევნო შედეგისადმი მსოფლიო მედია ყურადღებას იჩენს, ჟურნალისტები ჩამოხვედით აღმოსავლეთ ევროპიდან, სამხრეთ და ჩრდილოეთ ამერიკიდან, იაპონიიდან, მთელი მსოფლიოდან“, - აღნიშნა გორდონ კიოლერმა.

კიოლერმა ასევე თქვა, რომ კანონები, რომლებსაც ბრიუსელში თხზავენ, ჩვეულებრივი ადამიანისთვის გაუგებარია, სახელმწიფოებს კი უჭირთ საკუთარი გადმოსახედიდან მოერგონ ამ მკაცრ და ზედმეტად მჭიდრო ჩარჩოებს.

„კანონები, რომლებსაც ბრიუსელში თხზავენ, ჩვეულებრივი ადამიანისთვის გაუგებარია, სახელმწიფოებს კი უჭირთ საკუთარი გადმოსახედიდან მოერგონ ამ მკაცრ და ზედმეტად მჭიდრო ჩარჩოებს. ასევე, ნათელია, რომ ბრიუსელში მხოლოდ და მხოლოდ ძალაუფლების შენარჩუნებისთვის წევენ ძალისხმევას, ეროვნული სახელმწიფოები უფრო და უფრო მეტად შებოჭილნი ხდებიან. ბრიუსელში არ იციან ადგილზე რა ხდება, პოლიტიკის განსაზღვრა კი, ადგილზეა საჭირო.

ჩვენი პოლიტიკური მიდგომა გულისხმობს ნაკლებ ევროკავშირს, შესაბამისად კი, მეტ სუვერენიტეტს“, - დასძინა გორდონ კიოლერმა.