გურამ დავითაშვილი: გაძლიერდა დეპარტამენტის შესაძლებლობები, განხორციელდა მნიშვნელოვანი საკანონმდებლო ცვლილებები, გაუმჯობესდა სხვადასხვა უწყებას შორის კოორდინაცია, რამაც საბოლოო ჯამში მოგვცა იმის შესაძლებლობა, რომ უფრო ეფექტიანად აღვასრულოთ მიგრაციის კანონმდებლობა

გაძლიერდა დეპარტამენტის შესაძლებლობები, განხორციელდა მნიშვნელოვანი საკანონმდებლო ცვლილებები, გაუმჯობესდა სხვადასხვა უწყებას შორის კოორდინაცია, რამაც საბოლოო ჯამში, მოგვცა იმის შესაძლებლობა, რომ უფრო ეფექტიანად აღვასრულოთ მიგრაციის კანონმდებლობა, - განაცხადა გადაცემაში „იმედის კვირა“ შინაგან საქმეთა სამინისტროს მიგრაციის დეპარტამენტის დირექტორმა გურამ დავითაშვილმა.

მისივე თქმით, იგეგმება დეპარტამენტის ინფრასტრუქტურის გაძლიერება.

„იგეგმება დეპარტამენტის ინფრასტრუქტურის გაძლიერება, აჭარის რეგიონში იგეგმება ახალი ინფრასტრუქტურის მოწყობა, ახალი საშტატო ერთეულების შემოყვანა, ავტოპარკის კიდევ უფრო განახლება.

საბოლოო ჯამში, ყველანაირი ცვლილება ემსახურება იმას, რომ დეპარტამენტის ინსტიტუციური გაძლიერება მოხდეს, გამარტივდეს შესაბამისი აღსრულების პროცედურები და შეიქმნას ეფექტიანი სამართლებრივი მექანიზმები უკანონო მიგრაციასთან ბრძოლის მიმართულებით“, - აღნიშნა გურამ დავითაშვილმა.

მიგრაციის დეპარტამენტის დირექტორმა განიხილა დეპარტამენტის მიერ მიღწეული შედეგები და ასევე ისაუბრა სამომავლოდ განსახორციელებელ აქტივობებზე.

„თუ გასულ წელს ქვეყნიდან გაძევებული იყო 1 300 უცხო ქვეყნის მოქალაქე, მიმდინარე 2026 წლის სექტემბრის პირველი ნახევრის მონაცემებით, ქვეყნიდან გაძევებულია უკვე დაახლოებით 2 900 უცხო ქვეყნის მოქალაქე. დეპარტამენტის ამოცანა გახლავთ მიმდინარე წელს ქვეყნიდან გაძევებული იყოს, სულ მცირე, 4 000 არალეგალი მიგრანტი, ასევე გვაქვს მომავალი წლის სამიზნე რიცხვი, მინიმუმ, გავაორმაგოთ 2026 წლის შედეგი.

ეს სტატისტიკა ნათლად აჩვენებს, რომ უკანონო მიგრაციასთან ბრძოლა დღეს კიდევ უფრო ინტენსიურ რეჟიმში მიმდინარეობს და შესაბამისად, მიგრაციის დეპარტამენტის შესაძლებლობები მნიშვნელოვნად არის გაძლიერებული“, - განმარტა გურამ დავითაშვილმა.