გურამ ფალავანდიშვილი: ზოგადად, „არაბიზაცია“ ხდება დასავლეთში, ამიტომ ლეგიტიმურია შიშები, უბრალოდ საქართველოში საბედნიეროდ ეს არ ხდება. ვაი პოლიტიკოსების მხრიდან არის ეს თემა სპეციალურად ანგაჟირებული

ზოგიერთი ვაი პოლიტიკოსის მიზანი არის პოლიტიკური აქტიურობა და მთავრობის წინააღმდეგ ხალხის განწყობა, - განაცხადა გურამ ფალავანდიშვილმა „ქრონიკასთან“ Eagle Hills-ის პროექტზე.

მისი თქმით, ზოგადად, „არაბიზაცია“, „თურქიზაცია“ და „მუსლიმანიზაცია“ ხდება დასავლეთში, ამიტომ ლეგიტიმურია შიშები, უბრალოდ საქართველოში ეს არ ხდება საბედნიეროდ.

„ყველა, ვინც „არაბიზაციის“ წინააღმდეგ გამოდის, შეწუხდა, იქნება ეს სამღვდელო პირი, თუ საერო, მე მათ თანავუგრძნობ. ზოგადად, „არაბიზაცია“, „თურქიზაცია“ და „მუსლიმანიზაცია“ ცუდია, ეს ხდება დასავლეთში, ამიტომ ლეგიტიმურია შიშები. უბრალოდ საქართველოში ეს არ ხდება საბედნიეროდ. ვაი პოლიტიკოსების მხრიდან არის ეს თემა სპეციალურად ანგაჟირებული. თუ დავაკვირდებით [არაბული ქვეყნებიდან საქართველოში ჩამოსული] ყველა არის ახალგაზრდა, სტუდენტები. ზოგიერთი ვაი პოლიტიკოსის მიზანი არის პოლიტიკური აქტიურობა და მთავრობის წინააღმდეგ ხალხის განწყობა“, - აღნიშნა ფალავანდიშვილმა.

ე.წ არაბიზაციის შესახებ კამპანიას კონკრეტული სტატისტიკა ამხელს. 2024 წლის მონაცემებით, მოსახლეობის რიცხოვნობა ეროვნული/ეთნიკური წარმომავლობის მიხედვით ასეთია: ქართველი- სამი მილიონ 304 ათას 75, არაბი 12 ათას 533, რაც 0,3 მეათედი პროცენტია. ამ მონაცემში შედის შვიდი არაბული ქვეყნის წარმომადგენელი. ე.წ არაბიზაციის კამპანია შეფასდა როგორც ყალბი. მიზანი კი არის სახელმწიფოებრივი პროექტების ჩაშლა.