იყო ხანგრძლივი ოვაციები - ფილმ „გურიას“ რეჟისორი ლევან კოღუაშვილი, ვენეციის ფესტივალზე ფილმის მსოფლიო პრემიერასა და „ოსკარისთვის“ მზადებაზე

ფილმი „გურიას“ რეჟისორმა ლევან კოღუაშვილმა გადაცემაში „დღის ქრონიკა,“ ვენეციის 83-ე საერთაშორისო კინოფესტივალზე თავისი ფილმის „გურიას“ მსოფლიო პრემიერის დეტალებზე ისაუბრა.

რეჟისორის თქმით, ფილმი ფესტივალის სექციაში Venice Spotlight არის წარმოდგენილი, ფილმის პრემიერას კი ვენეციის კინოფესტივალის სტუმრები, კინოინდუსტრიის წარმომადგენლები და ოფიციალური პირები დაესწრნენ.

„გუშინ იყო ფილმის ოფიციალური პრემიერა. კარგი მიღება იყო. იყვნენ არა მხოლოდ გადამღები ჯგუფის ნაწილი, ასევე მსახიობები, პროდიუსერები, თანაპროდიუსერები, ფონდების წარმომადგენლები, რომლებიც დაგვეხმარნენ, იყვნენ კულტურის სამინისტროს წარმომადგენლებიც, კინოცენტრი, ორგანიზაციები, რომლებმაც დააფინანსეს პროექტი. იყო ხანგრძლივი ოვაციები“, - აღნიშნა რეჟისორმა.

რეჟისორის თქმით, საქართველოს კინემატოგრაფიის ეროვნული ცენტრი, „გურიას“ ამერიკის კინოაკადემიის ჯილდოს „ოსკარი“ საერთაშორისო სრულმეტრაჟიანი ფილმის კატეგორიაში საქართველოს კანდიდატ ფილმად წარადგენს, რისთვისაც შემოქმედებითი ჯგუფი უკვე ემზადება.

„ბრაიტონზე“ გამოცდილება შევიძინეთ „ოსკარის“ კამპანიასთან დაკავშირებით. პასუხისმგებლობაა, როდესაც შენ ფილმს წარადგენენ. იქნება ჩვენებები ამერიკაში. ძალიან ბევრი იქნება დამოკიდებული კამპანიაზე - ვის წაიყვან, როგორ დაიგეგმება. ეს ცხადია სერიოზულ ფინანსებთანაა დაკავშირებული. გამოცდილება არსებობს, მე მაქვს პირადად, ჩემს ქართველ კოლეგებსაც აქვთ. ესეც ნაწილია ჩვენი კინემატოგრაფიული ცხოვრების. ხანდახან გირჩევნია უფრო მეტი დრო მოანდომო რაღაცის წერას და მონტაჟს, მაგრამ როდესაც მიდის [ნომინაციაზე] ფილმი, ვალდებულება გაქვს, რომ მაქსიმალურად მიხედო. ვეცდებით მაქსიმალურად კარგად წარმოვადგინოთ ქართული კინო, რადგან წელს ჩვენ ვართ „ოსკარებზე“ - აღნიშნა რეჟისორმა.