ირაკლი ბენდელიანი სულხან-საბასა და ინგოროყვას ქუჩებზე შენობების რეაბილიტაციაზე: კონტრაქტორების მიმართ ჩვენი ძირითადი მოთხოვნაა, რომ მაქსიმალურად მაღალი ხარისხით შესრულდეს სამუშაოები და შენობების ავთენტური მდგომარეობა არ უნდა დაიკარგოს
დედაქალაქის მერის მოადგილემ, ირაკლი ბენდელიანმა გადაცემაში „დღის ქრონიკაში“ სულხან-საბასა და ინგოროყვას ქუჩების რეაბილიტაციაზე ისაუბრა.
მისივე თქმით, სულხან-საბას ქუჩაზე სარეაბილიტაციო სამუშაოები მერიას უკვე დაწყებული აქვს. ბენდელიანის განმარტებით, პირველ ეტაპზე, მიწისქვეშა კომუნიკაციები სრულად შეიცვალა და განახლდა.
„სულხან-საბას ქუჩაზე ასფალტის დროებითი, ქვედა ფენა მოეწყო, რათა ადგილზე გადაადგილება შეუფერხებელი ყოფილიყო. რაც შეეხება სამუშაოების მეორე ეტაპს, რამდენიმე დღეში ჩვენ დავიწყებთ უშუალოდ შენობა-ნაგებობების სარესტავრაციო-სარეაბილიტაციო სამუშაოებს.
პარალელურ რეჟიმში, ინგოროყვას ქუჩაზე მიმდინარეობს სატრანსპორტო სქემის დამუშავება, რომ იქაც მოხდეს მოძრაობის მიმართულებების შეცვლა. ამის შესახებ მოსახლეობას დამატებით შემდეგ მივაწვდით ინფორმაციას. რამდენიმე დღეში შენობების სარეაბილიტაციო სამუშაოებს დავიწყებთ. კონტრაქტორების მიმართ ჩვენი ძირითადი მოთხოვნაა, რომ მაქსიმალურად მაღალი ხარისხით შესრულდეს სამუშაოები და შენობების ავთენტური მდგომარეობა არ უნდა დაიკარგოს.
ორივე ქუჩაზე დაახლოებით, 450-მდე ოჯახი ცხოვრობს. სამუშაოები მაქსიმუმ, ორი წლის განმავლობაში სრულად დასრულდება“, - განაცხად ირაკლი ბენდელიანმა.
იმედი
წყარო: imedinews.ge