ირაკლი ჭეიშვილი: განმარტებები უნდა გააკეთონ ევროკავშირმა, ევროკავშირის ელჩმა საქართველოში, რატომ ხდება კიდევ კანონის გვერდის ავლით სხვადასხვა რადიკალური ოპოზიციის ღონისძიებების დაფინანსება - ჩვენს კანონმდებლობას უნდა დაემორჩილოს ნებისმიერი ევროპული ქვეყანა

ევროკავშირმა განმარტებები უნდა გააკეთონ ევროკავშირმა, ევროკავშირის ელჩმა საქართველოში, რატომ ხდება კიდევ კანონის გვერდის ავლით სხვადასხვა რადიკალური ოპოზიციის ღონისძიებების დაფინანსება, - განაცხადა საპარლამენტო უმრავლესობის წევრმა, ირაკლი ჭეიშვილმა ბახმაროში გამართული შეხვედრის შესახებ, რომელიც ევროპის საბჭოს მხარდაჭერით, არმაზ ახვლედიანის ორგანიზებით გაიმართა.

ჭეიშვილი აღნიშნავს, რომ საქართველოს კანონმდებლობას ყველა უნდა დაემორჩილოს.

„სამწუხაროა, რომ მსგავსი ფაქტები კიდევ შეიძლება, მოხდეს საქართველოში. ჩვენ მივიღეთ გამჭვირვალობის შესახებ კანონი, გრანტების შესახებ კანონი და ჩვენს კანონმდებლობას უნდა დაემორჩილოს ნებისმიერი ევროპული ქვეყანა. დიდი ალბათობით, ეს არის კანონის გვერდის ავლით, ევროსაბჭოს ფულით დაფინანსებული ღონისძიება. დაველოდოთ აუდიტის სამსახურს, დაიდება დასკვნა და გაკეთდება შეფასებები“, - განაცხადა ჭეიშვილმა.

ცნობისთვის, ბახმაროში გამართულ სემინარს, რომელიც ევროსაბჭოს მხარდაჭერით გაიმართა, აუდიტის სამსახური შეისწავლის.