ირაკლი კირცხალია ევროკომისრის მხრიდან კრიტიკასა და კანონების გაუქმების მოთხოვნაზე: ისინი ვერ შემოდიან ობიექტურ დისკუსიაში და მათგან მხოლოდ მასკარადსა და პიარ შოუს ვხედავთ, რომელიც გაცვდა - ასეთივე გაცვეთილია ეს შეფასება

საპარლამენტო უმრავლესობის ლიდერი, პარლამენტის ფრაქცია „ქართული ოცნების“ თავმჯდომარე ირაკლი კირცხალია ევროკომისარ მარტა კოსის კრიტიკასა და კონკრეტული კანონების გაუქმების მოთხოვნას გამოეხმაურა.

მისი თქმით, ეს შეფასება გაცვეთილია ისე, როგორც ის მასკარადი და პიარ შოუ, რომელსაც საზოგადოება მათი მხრიდან ხედავს.

„რომელი კანონების გაუქმებას გულისხმობს ევროკომისარი? ალბათ გამჭვირვალეობის, ოჯახური ღირებულებების კანონს, ან მანიფესტაციებთან დაკავშირებულ კანონს. ნებისმიერი კანონი, რომელიც ამ დარბაზში არის მიღებული ან მომავალში მიიღება, ემსახურება მხოლოდ და მხოლოდ ჩვენი ქვეყნის საუკეთესო ინტერესებს. ამა თუ იმ კანონს მხოლოდ და მხოლოდ ჩვენი ქვეყნის უსაფრთხოებისა და ინტერესებიდან გამომდინარე იღებს პასუხისმგებლობიანი ხელისუფლება და გუნდი, რომელსაც აქვს ჩვენი საზოგადოების უმრავლესობის მანდატი. ყველას კარგად გვახსოვს, რომ როდესაც იყო თითოეული ჩამოთვლილი კანონპროექტი ჩვენ მზად ვიყავით ნებისმიერი დისკუსიისთვის და ღიად ვამბობდით, რომ შევიდეთ გნებავთ ღია, გნებავთ დახურულ დისკუსიაში. ისინი ამას ვერ აკეთებენ იმიტომ, რომ ობიექტურად დისკუსიაში რადგან არ არიან ობიექტურები და ყველაფერთან ერთად ვხედავთ მასკარადს, პიარ შოუს, რომელიც გაცვდა. ასე რომ ასეთივე გაცვეთილია ეს შეფასება",- აღნიშნა კირცხალიამ.