ირაკლი კირცხალია მაკრონისა და მერცის რეიტინგის ვარდნაზე: არ არსებობს, ეს იყოს გამოწვეული სწორი პოლიტიკით

ეს კვლევა პირდაპირი შედეგია არასწორი პოლიტიკის, - განაცხადა საპარლამენტო უმრავლესობის ლიდერმა, ირაკლი კირცხალიამ მაკრონისა და მერცის რეიტინგის ვარდნასთან დაკავშირებით.

„ამას განაპირობებს ის ეკონომიკური მდგომარეობა, რომელიც დღეს არის ევროპის ქვეყნებში, განსაკუთრებით ისეთ ქვეყნებში, როგორიც არის საფრანგეთი, გერმანია. რთულია შეხვიდე ამა თუ იმ ლიდერის რეიტინგზე, მაგრამ ესა თუ ის ლიდერი, ყოველთვის წარმოადგენს პოლიტიკას, იმ პოლიტიკას, რომელ პოლიტიკასაც ახორციელებს თავის ქვეყანაში და ამ შემთხვევაში არა მხოლოდ თავის ქვეყანაში, არამედ იმ ეკონომიკურ კავშირში, რომლის წევრებიც ისინი არიან. ვფიქრობ, რომ ეს შედეგი, კომპლექსურია. მაგრამ, რადგან ევროკავშირზე ვსაუბრობთ, ეს არის ეკონომიკური კავშირი და ყველამ კარგად ვიცით და ვხედავთ რა გამოიწვია იმ სანქციებმა, რომელმაც შემდეგ პირდაპირი გავლენა მოახდინა ევროპელის ჯიბეზე.

ასევე კარგად ვხედავთ ევროკავშირის ქვეყნების საგარეო პოლიტიკაში და ვექტორში იმ ომის რიტორიკას, რასაც ისინი ყოველდღე ატარებენ.

კავშირში, რომელიც თავის დროზე მსოფლიო ეკონომიკის 30%-ს იკავებდა და დღეს მისი ნახევარია, არ არსებობს, რომ ეს იყოს გამოწვეული სწორი პოლიტიკით. ასე, რომ ყველაფერი კომპლექსურად ამის გამოძახილია“, - აღნიშნა კირცხალიამ.

საფრანგეთში მაკრონის, გერმანიაში კი მერცის რეიტინგი დაბალ ნიშნულზეა. კვლევებით, ორივე ქვეყანაში მოსახლეობის უმრავლესობა მთავრობის საქმიანობით უკმაყოფილოა. სადამდე მიიყვანა ევროპული ბიუროკრატია „დიფ სთეითის“ მორჩილებამ, თბილისში პოლიტიკური შეფასებები კეთდება.