ირაკლი კობახიძე: ჩქაროსნული ავტომაგისტრალების მშენებლობა მნიშვნელოვანია როგორც სოციალური თვალსაზრისით, ისე განსაკუთრებული დატვირთვა აქვს ეკონომიკურ ჭრილში, ჩვენი ერთ-ერთი უმთავრესი მიზანია სატრანზიტო ფუნქციის განვითარება და ამ კუთხით ჩქაროსნული ავტომაგისტრალები ძალიან მნიშვნელოვან როლს ასრულებს

ჩქაროსნული ავტომაგისტრალების მშენებლობა ძალიან სწრაფი ტემპით გრძელდება, ჩვენ დღეს გავხსენით სამტრედია-გრიგოლეთის ავტომაგისტრალის მე-3 მონაკვეთი, მომავალი წლისთვის გაიხსნება უკვე მთლიანად ეს მაგისტრალი, რომელიც შეადგენს 52 კილომეტრს, - განუცხადა ჟურნალისტებს პრემიერ-მინისტრმა, ირაკლი კობახიძემ.

მისივე თქმით, ჩქაროსნული ავტომაგისტრალების მშენებლობა ძალიან მნიშვნელოვანია როგორც სოციალური, ისე ეკონომიკური თვალსაზრისით.

„ეს ყველაფერი მნიშვნელოვანია ჩვენი საზოგადოებისთვის სოციალური თვალსაზრისით - უფრო მეტად დააახლოებს ავტომაგისტრალი ერთმანეთთან ჩვენს დასახლებებს და გააადვილებს გადაადგილებას ჩვენი მოქალაქეებისთვის და ჩვენი სტუმრებისთვის. ამასთან, ჩქაროსნული ავტომაგისტრალების მშენებლობას აქვს განსაკუთრებული დატვირთვა ეკონომიკური თვალსაზრისით. ჩვენი ერთ-ერთი უმთავრესი მიზანია სატრანზიტო ფუნქციის განვითარება და ამ კუთხით, რა თქმა უნდა, ჩქაროსნული ავტომაგისტრალები ძალიან მნიშვნელოვან როლს ასრულებს. მინდა, მადლობა გადავუხადო ყველას, ვინც ჩართული იყო ამ პროექტის განხორციელებაში, განსაკუთრებით ინფრასტრუქტურის სამინისტროსა და ინფრასტრუქტურის მინისტრს“, - აღნიშნა პრემიერმა.