ირაკლი ქადაგიშვილი: არ უნდა გაგვიკვირდეს ის, რომ მიხეილ სააკაშვილი წაახალისებს ყველაფერ იმას, რაც ქვეყანაში პოლარიზაციას, ადამიანებს შორის დაპირისპირებას, ეროვნული ფასეულობებისა და ღირებულებების შეურაცხყოფას ემსახურება

რეგიონული პოლიტიკისა და თვითმმართველობის საპარლამენტო კომიტეტის თავმჯდომარის, ირაკლი ქადაგიშვილის განცხადებით, მიხეილ სააკაშვილი ახალისებს ყველაფერ იმას, რაც ქვეყანაში პოლარიზაციას, ადამიანებს შორის დაპირისპირებას და ღირებულებების შეურაცხყოფას ემსახურება.

იგი მიხეილ სააკაშვილის მიერ ონისე ოქრიაშვილისთვის გამოხატულ მხარდაჭერის ფაქტს გამოეხმაურა.

„არ უნდა გაგვიკვირდეს ის, რომ მიხეილ სააკაშვილი წაახალისებს ყველაფერ იმას, რაც ამ ქვეყანაში პოლარიზაციას, ადამიანებს შორის დაპირისპირებას, ეროვნული ფასეულობებისა და ღირებულებების შეურაცხყოფას ემსახურება.

ის განცხადებები, რასაც ის ადამიანი, თუ სხვა ამდაგვარი ადამიანები აკეთებდნენ საჯარო სივრცეში, მიტინგებზე თუ იმ კონკრეტულ „პოდკასტში“, ემსახურება ამას, რომ არ არსებობდეს ადამიანებისთვის, საზოგადოებისთვის გარკვეული მორალური, ზნეობრივი სტანდარტი. ეს ემსახურება საზოგადოების სწორედ აი, ასეთი ნგრევა-დაშლის პროცესის ხელშეწყობას. ამის თანამონაწილეა მიხეილ სააკაშვილი“, - განაცხადა ქადაგიშვილმა.

„რა კარგი ბიჭია ონისე ოქრიაშვილი, კომიკოსი, რომელსაც თავს დაესხნენ ქოცების ზონდერები, ნათელი, განათლებული, გონებაგახსნილი, პოზიტიური!“, - წერს სოციალურ ქსელში მსჯავრდებული მიხეილ სააკაშვილი.