ირაკლი ქადაგიშვილი: ის, რაც ხდება ქართულ ოპოზიციაში, ამასთან დაკავშირებით გარკვეული პასუხისმგებლობა ეკისრებათ იმ პოლიტიკურ ძალებს დასავლეთში, ვინც ასეთი ტიპის ოპოზიციური საქმიანობის წახალისებით იყვნენ დაკავებულები

ის, რაც ხდება ქართულ ოპოზიციაში, ამასთან დაკავშირებით გარკვეული პასუხისმგებლობა ეკისრებათ იმ პოლიტიკურ ძალებს დასავლეთში, ვინც ასეთი ტიპის ოპოზიციური საქმიანობის წახალისებით იყვნენ დაკავებულები, - განაცხადა გადაცემაში „დღის ქრონიკა“ რეგიონული პოლიტიკისა და თვითმმართველობის საპარლამენტო კომიტეტის თავმჯდომარე ირაკლი ქადაგიშვილმა.

ქადაგიშვილის თქმით, ოპოზიცია ამ მდგომარეობამდე სწორედ აღნიშნულმა პოლიტიკამ მიიყვანა.

როგორც მან განმარტა, მიუხედავად იმისა, რომ არჩევნების საწინააღმდეგოდ არცერთი არგუმენტი თუ რეალური ფაქტი არ ჰქონიათ, ოპოზიცია აიძულეს უარი ეთქვათ არჩევნების შედეგებზე.

„უარი თქვეს მანდატებზე და არ იყო ეს მცირე რაოდენობა მანდატების. 61 მანდატი 150 ადგილიან პარლამენტში. ამაზე ევროკავშირს ერთი სიტყვაც არ დასცდენია, რომ ეს არის დემოკრატიის საბოტაჟი, საკუთარი ამომრჩევლის ნების უარყოფა“, - განაცხადა ირაკლი ქადაგიშვილმა.

ირაკლი ქადაგიშვილის თქმითვე, პირიქით, მათი შემდგომი ნაბიჯებით ისინი მხარს უჭერდნენ საქართველოში რევოლუციური სცენარების განხორციელებას.

„4 ოქტომბრის გადატრიალება ადგილობრივი თვითმმართველობის არჩევნების დღეს იყო ევროკავშირის მხრიდან მხარდაჭერილი. გვესმის საერთოდ რა მოცემულობაში არიან შესულები? სწორედ ასეთმა პოლიტიკამ, ასეთი პოლიტიკის წახალისებამ და კულტივირებამ მიიყვანა ოპოზიცია ამ მდგომარეობამდე“, - აღნიშნა მან.