ჯეი დი ვენსი ისრაელზე: მათ სისტემაში არსებობენ ადამიანები, და ჩვენ ამაში ეჭვიც არ გვეპარება, რომლებიც ამერიკული საზოგადოებრივი აზრის მანიპულირებას ცდილობენ, რათა ომი განუსაზღვრელი ვადით გაგრძელდეს

აშშ-ის ვიცე-პრეზიდენტმა, ჯეი დი ვენსმა ისრაელის მთავრობის ცალკეული ჯგუფები ირანთან ომის შესახებ აშშ-ის საზოგადოებრივი აზრის ფორმირების კამპანიის ორგანიზებასა და კონფლიქტის დასრულებისკენ მიმართული მოლაპარაკებების საბოტაჟში დაადანაშაულა, - წერს გამოცემა The Wall Street Journal-ი.

„მათ სისტემაში არსებობენ ადამიანები, და ჩვენ ამაში ეჭვიც არ გვეპარება, რომლებიც ამერიკული საზოგადოებრივი აზრის მანიპულირებას ცდილობენ, რათა ომი განუსაზღვრელი ვადით გაგრძელდეს“, - განაცხადა ვენსმა ჯო როგანთან სამსაათიანი საუბრისას. „არა რაიმე კონკრეტული მიზნისთვის, არამედ უბრალოდ, უსასრულოდ“.

ჯეი დი ვენსის ეს განცხადება ვაშინგტონსა და მის უახლოეს მოკავშირეს შორის არსებული საჯარო დაპირისპირების ახალ ეტაპზე მიანიშნებს. ვენსმა, რომელიც გასულ თვეში ირანთან ცეცხლის შეწყვეტის შეთანხმების მიღწევაში მონაწილეობდა, განვითარებული მოვლენები „უცხოური გავლენის კამპანიად“ შეაფასა, რომელიც დიპლომატიური ძალისხმევის ჩაშლას ისახავს მიზნად.

ისრაელმა ასობით მილიონი დოლარი მიმართა ომისადმი აშშ-ის მხარდაჭერის განსამტკიცებლად და საკუთარი საერთაშორისო რეპუტაციის გასაუმჯობესებლად, მათ შორის 45 მილიონი დოლარის ღირებულების ლობისტური კონტრაქტი გააფორმა პრეზიდენტ ტრამპის საარჩევნო კამპანიის ყოფილ მენეჯერთან, ბრედ პარსკეილთან. თავის მხრივ, ვენსმა Time-ის პუბლიკაციაზე დაყრდნობით განაცხადა, რომ ისრაელმა ამ თანხების ნაწილი იმ ონლაინ-ინფლუენსერების დასაფინანსებლად გამოიყენა, რომლებიც მის წინააღმდეგ მიზანმიმართულ კამპანიას აწარმოებდნენ.

„როდესაც Time-ის ჟურნალის გვერდებს ვშლი და ვხედავ, რომ არსებობს უცხოური გავლენის პირდაპირი კამპანია, რომელიც ფინანსდება იმ გარიგების ჩასაშლელად, რომელსაც მე თავად ვუწევდი ლობირებას და, სხვათა შორის, იმ ადამიანთაგან ბევრი, ვინც ამ ფულს იღებდა, რეალურად მე მესხმოდა თავს სრულიად უპატიოსნო მეთოდებით, ჩემი პასუხი ამაზე არის: „კეთილი, მაშინ ჯოჯოხეთში გქონიათ გზა!“ - განაცხადა ვენსმა.