ჟოზეფ ბორელი: ევროკომისია დიდი ხანია აღარ წარმოადგენს ევროკავშირს, არამედ - მხოლოდ ევროკომისიას
ევროკავშირის ყოფილი უმაღლესი წარმომადგენელი საგარეო პოლიტიკისა და უსაფრთხოების საკითხებში ჟოზეფ ბორელი ევროკომისიას საგარეო პოლიტიკისა და თავდაცვის სფეროში მზარდი როლის გამო მკაცრად აკრიტიკებს და აცხადებს, რომ ეს ევროკავშირის ხელშეკრულებით განსაზღვრულ უფლებამოსილებებს სცდება. ინფორმაციას POLITICO ავრცელებს.
ბორელის თქმით, ევროკომისიასა და ევროკავშირის საგარეო ქმედებათა სამსახურს შორის ფუნქციების გადაფარვამ საგარეო პოლიტიკის სისტემაში „საკმაოდ დიდი არეულობა“ შექმნა. მისი აზრით, ფონ დერ ლაიენის მმართველობისას, ევროკომისია გასცდა თავის მანდატს და ევროკავშირის საგარეო ქმედებათა სამსახურისა და ეროვნული მთავრობების კომპეტენციებში ჩაერია.
„ევროკომისია არ საუბრობს ევროკავშირის სახელით; ის მხოლოდ საკუთარ თავს წარმოადგენს“, - განაცხადა ბორელმა POLITICO-თან ინტერვიუში.
მისი შეფასებით, ეს არის ერთ-ერთი ყველაზე პირდაპირი საჯარო კრიტიკა ევროკომისიის მისამართით, რომელიც პრეზიდენტ ურსულა ფონ დერ ლაიენის მმართველობის პერიოდში საგარეო დიპლომატიურ გავლენას თანდათან აფართოებს.
ბორელი, რომელიც 2019–2024 წლებში ევროკავშირის საგარეო პოლიტიკას ხელმძღვანელობდა და ამ თანამდებობაზე დღეს ის კაია კალასმა შეცვალა, აცხადებს, რომ ევროკავშირის აღმასრულებელი ორგანო ფაქტობრივად სცდება საკუთარ მანდატს.
ესპანელი პოლიტიკოსი, რომელიც წარსულში ესპანეთის საგარეო საქმეთა მინისტრი და ევროპარლამენტის პრეზიდენტიც იყო, ცნობილია მკაცრი პოზიციებით საგარეო პოლიტიკურ საკითხებზე. ის არაერთხელ დაუპირისპირდა ევროკომისიის ხელმძღვანელობასაც, წერს POLITICO.
ბორელი ხაზს უსვამს, რომ საგარეო და თავდაცვის საკითხები მთავრობათაშორისი პრეროგატივაა და ევროკომისია „ჩრდილოვან პენტაგონად“ ვერ გადაიქცევა.
