კახა კალაძე „ინტერ რაოს“ დასანქცირებაზე: ეს ბიზნესსაქმიანობაა და სახელმწიფოს მხრიდან მასში უხეშად ჩარევა, ეწინააღმდეგება იმ პრინციპებს, რომელსაც 2012 წლიდან მოვყვებით

„ეს ბიზნესსაქმიანობაა და სახელმწიფოს მხრიდან მასში უხეშად ჩარევა, რა თქმა უნდა, ეწინააღმდეგება იმ პრინციპებს, რომელსაც 2012 წლიდან მოვყვებით“, - განაცხადა თბილისის მერმა კახა კალაძემ ევროკავშირის მიერ კომპანია „ინტერ რაოს“ დასანქცირებასთან დაკავშირებით დასმული შეკითხვის საპასუხოდ.

მისი თქმით, საქართველოში ბიზნესი ხელშეუხებელია და კონკრეტული კომპანიის მესაკუთრეები ამა თუ საკითხს თავად მოაგვარებენ.

„რაც შეეხება „ინტერ რაოს“ დასანქცირებას, მასთან ერთად არიან სხვა მესაკუთრეები, როგორც ვიცი, ქართველებიც. ერთმანეთში გაერკვევიან. ეს ბიზნესსაქმიანობაა და სახელმწიფოს მხრიდან მასში უხეშად ჩარევა, რა თქმა უნდა, ეწინააღმდეგება იმ პრინციპებს, რომელსაც ვიცავთ და 2012 წლიდან მოვყვებით. თუ საჭირო აუცილებლობა იქნება სახელმწიფოს მხრიდან რაიმე ტიპის მოქმედებების, რა თქმა უნდა, შესაბამის ნაბიჯებს გადავდგამთ, თუმცა ბიზნესი ხელშეუხებელია, თავად მოაგვარებენ და გაერკვევიან საკითხში“, - განაცხადა კახა კალაძემ.

თბილისის მერმა ასევე აღნიშნა, რომ მსგავსი სტრატეგიული ობიექტები რუსულ კომპანიებზე სწორედ წინა ხელისუფლების დროს გასხვისდა.

„ის ყველაფერი, რაზეც ჩვენ ვსაუბრობთ, იყო საქართველოს საკუთრება. როდესაც ვსაუბრობთ „სისხლიან რეჟიმზე“, ზუსტად ერთ-ერთი კონკრეტული გადადგმული ნაბიჯი იყო მსგავსი კომპანიების გასხვისება რუსულ სახელმწიფო კომპანიებზე. გამოდიოდნენ და გვეუბნებოდნენ, რომ რუსულ ფულს სუნი არ ასდისო; გვეუბნებოდნენ, არაფერი ფუჭდება იმით, რომ ქვეყანაში რუსული ბიზნესი შემოდის და ახორციელებს საქმიანობასო. ეს ყველაფერი ხდება 2008 წლის შემდეგ. წერილებს აგზავნიდნენ, რომ როგორმე დაეთბოთ ურთიერთობები, გაემართათ კულტურული ღონისძიებები ჩვენს ქვეყანაში. მას შემდეგ, რაც რუსეთ-უკრაინის ომი გაჩაღდა, წამოვიდა დავალება „დიფ სთეითიდან“ - მათი პატრონებიდან და თუ რაიმეს რუსული ჰქვია, ყველაფერი ამის წინააღმდეგ ბრძოლა დაიწყეს. ეს არის ჩვეულებრივი ფარისევლობა. ასევე, ეს ყველაფერი მიუთითებს იმაზე, რომ პირნათლად ასრულებენ დავალებებს, რომლებიც თავიანთი პატრონების მხრიდან მოდის. კიდევ ერთხელ ვიმეორებ, თუ სახელმწიფოს მხრიდან იქნება საჭირო და აუცილებელი კონკრეტული ნაბიჯების გადადგმა, აუცილებლად გადავდგამთ“, - აღნიშნა დედაქალაქის მერმა.