კიევის სოციოლოგიის საერთაშორისო ინსტიტუტის გამოკითხვა: უკრაინელების უმრავლესობას მიაჩნია, რომ ქვეყანამ უნდა გააგრძელოს შეიარაღებული წინააღმდეგობა რუსული აგრესიის მიმართ, ენერგოსექტორზე რეგულარული იერიშებისა და ელექტროენერგიისა თუ გათბობის დეფიციტის მიუხედავადაც კი

უკრაინელების უმრავლესობას მიაჩნია, რომ ქვეყანამ უნდა გააგრძელოს შეიარაღებული წინააღმდეგობა რუსული აგრესიის მიმართ, ენერგოსექტორზე რეგულარული იერიშებისა და ელექტროენერგიისა თუ გათბობის დეფიციტის მიუხედავადაც კი. ამას მოწმობს კიევის სოციოლოგიის საერთაშორისო ინსტიტუტის გამოკითხვის შედეგები.

კვლევის მონაცემებით, რესპონდენტთა 77%-მა მკაფიოდ განაცხადა, რომ ბრძოლა უნდა გაგრძელდეს. მათ მიაჩნიათ, რომ უკრაინამ არ უნდა შეწყვიტოს შეიარაღებული წინააღმდეგობა იმ შემთხვევაშიც კი, თუ მოსახლეობის ნაწილს ხანგრძლივად მოუწევს ელექტროენერგიის, გათბობისა და საკანალიზაციო სისტემების გარეშე ყოფნა.

ამავდროულად, გამოკითხულთა 12%-ის აზრით, ასეთ მძიმე პირობებში უკრაინა უნდა დათანხმდეს რუსეთის ნებისმიერ მოთხოვნას, მაშინაც კი, თუ ეს კაპიტულაციის ტოლფასი იქნება. ხოლო 11%-ს გაუჭირდა საკუთარი პოზიციის მკაფიოდ დაფიქსირება.

ზამთრის საყოფაცხოვრებო სირთულეების მიუხედავად, წინააღმდეგობის გაწევის მზადყოფნა ჭარბობს უკრაინის ყველა რეგიონში. ბრძოლის გაგრძელების მხარდაჭერა 68%-იდან (აღმოსავლეთში) 83%-მდე (კიევში) მერყეობს.

შეიარაღებული წინააღმდეგობის მხარდაჭერის ყველაზე მაღალი მაჩვენებელი სწორედ კიევში დაფიქსირდა, მტრის მიერ ბალისტიკური რაკეტებითა და რეაქტიული დრონებით განხორციელებული ინტენსიური თავდასხმების მიუხედავად.