კოტე ჟღენტი: ვფიქრობ, რომ ორმაგი სტანდარტი მუდმივად იქნება დიდი სახელმწიფოების მხრიდან საქართველოს და საქართველოს მსგავსი სახელმწიფოების მიმართ

ვფიქრობ, რომ ორმაგი სტანდარტი მუდმივად იქნება დიდი სახელმწიფოების მხრიდან საქართველოს და საქართველოს მსგავსი სახელმწიფოების მიმართ, იმიტომ რომ ისინი თვლიან, რომ შეუძლიათ ჭკუა დაგვარიგონ და გვასწავლონ ისეთი რამეები, რაც მათი აზრით, ჩვენ ყოველგვარი კომენტარისა და საკუთარი დამოკიდებულების გარეშე უნდა შევასრულოთ, - განაცხადა პარტია „ერთიანი ნეიტრალურ საქართველოს“ მრჩეველმა, დიპლომატმა კოტე ჟღენტმა „დღის ქრონიკაში“.

მისი თქმით, პრემიერ-მინისტრის წერილი ევროკავშირის ლიდერებისადმი დროული და საჭირო იყო, თუმცა ეჭვი ეპარება, რომ ირაკლი კობახიძე პასუხს მიიღებს.

„თუ ამას არანაირი პასუხი არ ექნება, მაშინ ვიცით, რომ პასუხის არგაცემაც გარკვეული შედეგია და აქედანაც გარკვეული დასკვნების გამოტანა შეიძლება. მათი მხრიდან პასუხის არმიცემა იქნება დასტური იმისა, რომ ისინი ამ პოლიტიკას არ შეიცვლიან, რამდენი წელიც არ უნდა მივცეთ. კარგად ხედავთ, რომ 3 ზესახელმწიფო [აშშ, ჩინეთი, რუსეთი] გლობალური პოლიტიკით გარკვეულ გადაწყვეტილებებს მიიღებენ, გარკვეულწილად შეიძლება ევროპა ამაში რაღაცნაირად გათვალისწინებული იყოს, მაგრამ იმ როლს, რასაც ევროპა ფიქრობს, რომ გლობალური პროცესების დარეგულირებაში ითამაშებს, მგონია რომ ვერ ითამაშებს, გამომდინარე იმ მდგომარეობიდან, რაშიც ისინი ახლა არიან, როგორც გაერთიანება, ისევე მისი ცალკეული სახელმწიფოები“, - მიიჩნევს ჟღენტი.