კვლევა: ვენერამ შესაძლოა საკუთარი მთვარე შთანთქა

ვენერას შესაძლოა საკუთარი მთვარე ჰქონდა, რომელიც პლანეტას თანდათან მიუახლოვდა და საბოლოოდ მას შეეჯახა. ეს შესაძლოა ვენერას არსებობის პირველი მილიარდი წლის განმავლობაში მომხდარიყო, - იუწყება Reuters-ი კალიფორნიის უნივერსიტეტის სპეციალისტების კვლევაზე დაყრდნობით, რომელიც The Astrophysical Journal-ში გამოქვეყნდა.

ასეთი სცენარის მიზეზად ნაშრომის ავტორებს ვენერას უკიდურესად ნელი ბრუნვა მიაჩნიათ. საკუთარი ღერძის გარშემო ერთ სრულ ბრუნს პლანეტა დაახლოებით 243 დედამიწის დღე-ღამეს უნდება. კომპიუტერულმა მოდელირებამ აჩვენა, რომ ასეთ პირობებში სხვადასხვა ზომის ჰიპოთეზური თანამგზავრები დროთა განმავლობაში პლანეტას მიუახლოვდებოდნენ და საბოლოოდ მას შეეჯახებოდნენ.

დედამიწაზე საპირისპირო პროცესი მიმდინარეობს. ჩვენი პლანეტის ბრუნვა მთვარეს ენერგიას გადასცემს, რის გამოც თანამგზავრი წელიწადში დაახლოებით 4 სანტიმეტრით გვშორდება. ვენერა კი იმდენად ნელა ბრუნავს, რომ ანალოგიური მექანიზმი მის სავარაუდო მთვარეს ორბიტაზე ხანგრძლივად და მდგრადად ვერ დააკავებდა.

მკვლევართა გამოთვლებით, უფრო მასიური თანამგზავრები ვენერასთან დაახლოებას უფრო სწრაფად შეძლებდნენ, ვინაიდან მისი ბრუნივს სიჩქარეზე უფრო ძლიერი გავლენა ექნებოდათ. მთვარის შენარჩუნება მხოლოდ განსაზღვრული საწყისი პირობების შემთხვევაში იქნებოდა შესაძლებელი - ახალგაზრდა ვენერას ბევრად უფრო სწრაფად რომ ებრუნა.

ეს ჰიპოთეზა გვთავაზობს კიდევ ერთ ვარიანტს იმის ასახსნელად, თუ რატომ არ აქვს ვენერას ამჟამად ბუნებრივი თანამგზავრი. მანამდე მეცნიერები ორ ძირითად სცენარს განიხილავდნენ: პლანეტას მთვარე ან არასდროს ჩამოუყალიბდა, ან ის მსხვილი კოსმოსური შეჯახების შემდეგ გაქრა.

ძველი ვენერიანული მთვარის არსებობის პირდაპირი კვალი ჯერჯერობით აღმოჩენილი არ არის. ავტორები იმედოვნებენ, რომ ვენერას მომავალი კვლევები დაეხმარებათ ისეთი ნიშნების პოვნაში, რომლებიც შეთავაზებული სცენარის შემოწმების საშუალებას მოგვცემს.