ლავროვი და რუბიო 23 ივლისს ერთმანეთს შეხვდებიან

რუსეთის საგარეო საქმეთა მინისტრის სერგეი ლავროვის განცხადებით, ის 23 ივლისს აშშ-ის სახელმწიფო მდივანთან მარკო რუბიოსთან პირისპირ შეხვედრას გამართავს.

ლავროვისა და რუბიოს შეხვედრა ფილიპინების დედაქალაქ მანილაში სამხრეთ-აღმოსავლეთ აზიის სახელმწიფოთა ასოციაციის სამიტის ფარგლებში გაიმართება.

„შეხვედრა უკვე შეთანხმებულია“, - განაცხადა ლავროვმა მანილაში გამართული პრესკონფერენციის დროს.

რუსეთის პირველმა დიპლომატმა იმედი გამოთქვა, რომ შეხვედრის დასრულების შემდეგ ორივე მხარეს მიეცემა საშუალება მედიას მოლაპარაკებების შთაბეჭდილებები გაუზიაროს.

„ნებისმიერ შემთხვევაში, შეხვედრა სასარგებლო იქნება. სჯობს პირდაპირ დავსვათ კითხვები და მათზე პასუხები მივიღოთ“, - დასძინა ლავროვმა.