ლავროვი: რუსეთის ფედერაციის საგარეო საქმეთა სამინისტროში გამართულ შეხვედრაზე საფრანგეთის, გერმანიისა და დიდი ბრიტანეთის ელჩებს ახალი არაფერი მოუტანიათ

რუსეთის საგარეო საქმეთა მინისტრმა სერგეი ლავროვმა განაცხადა, რომ საფრანგეთის, გერმანიისა და დიდი ბრიტანეთის ელჩებს გასულ კვირას მის უწყებაში გამართულ შეხვედრაზე „ახალი არაფერი“ მიუტანიათ. ამ თემაზე მან მინსკში ისაუბრა, სადაც ბელარუსის პრეზიდენტს, ალექსანდრ ლუკაშენკოს შეხვდა.

მისი თქმით, მათ განიხილეს დასავლეთის ქვეყნების როლი „იმ საკითხების მოგვარებაში, რომლებიც სცილდება უშუალოდ უკრაინის კონფლიქტის ფარგლებს და ეხება უსაფრთხოების ზოგად პრინციპებს როგორც ევროპაში, ისე გლობალურ დონეზე“.

„ჩვენ ერთიანი პოზიცია გვაქვს. ევროპელები არსებულ სიტუაციაში აკეთებენ მცდარ დასკვნებს იმის შესახებ, რომ თითქოს რუსეთი ახლა აგებს, ხოლო უკრაინა იგებს, ამიტომ შესაძლებელია ულტიმატუმების წაყენება იმ იმედით, რომ რუსეთი ამ ულტიმატუმებს მიიღებს“, - განაცხადა ლავროვმა.

მისი თქმით, ევროპელების გათვლები „ილუზორულია“, რაც ასევე დადასტურდა 11 ივნისს რუსეთის ფედერაციის საგარეო საქმეთა სამინისტროში სამი ქვეყნის - დიდი ბრიტანეთის, საფრანგეთისა და გერმანიის ელჩების ვიზიტის დროსაც.

„მათ ჩემი მოადგილე ესაუბრა. ახალი არაფერი მოუტანიათ“, - თქვა მინისტრმა.

ლავროვმა ასევე განაცხადა, რომ აშშ-ის პრეზიდენტის, დონალდ ტრამპის სპეციალური წარმომადგენლების რუსეთის ფედერაციაში დაგეგმილი ვიზიტის დროს განიხილება „შეთანხმებები“, რომლებიც 15 აგვისტოს ანკორიჯში იყო მიღწეული.

საფრანგეთის, დიდი ბრიტანეთისა და გერმანიის ელჩები - ნიკოლა დე რივიერი, ნაიჯელ კეისი და ალექსანდრ ლამბსდორფი რუსეთის საგარეო საქმეთა სამინისტროს 11 ივნისს ეწვივნენ. გავრცელებული ინფორმაციით, შეხვედრა უკრაინაში ომის განსახილველად სწორედ მათი ინიციატივით შედგა.

მედიის ინფორმაციით, გერმანია, საფრანგეთი და დიდი ბრიტანეთი ამუშავებენ გეგმას ვლადიმერ პუტინის მოლაპარაკებებში ჩასართავად.