ლაზარე ჯორბენაძის მეუღლის გამოკითხვის ოქმი ირაკლი ღარიბაშვილის განცხადების საპირისპიროდ - „ქრონიკამ“ ჯორბენაძის მეუღლის გამოკითხვის ოქმი მოიპოვა, სადაც ის ლაზარე ჯორბენაძის მძიმე ფსიქოლოგიურ პრობლემებზე და შფოთვით აშლილობაზე საუბრობს

ირაკლი ღარიბაშვილს, რომელიც გამოქვეყნებულ განცხადებაში ლაზარე ჯორბენაძის თვითმკვლელობას კითხვის ნიშნის ქვეშ აყენებს, პასუხს ჯორბენაძის მეუღლის გამოკითხვის ოქმი სცემს.

„ქრონიკამ“ მოიპოვა დოკუმენტი, სადაც ჯორბენაძის მეუღლე დეტალურად ჰყვება მის ფსიქოლოგიურ მდგომარეობაზე. წერია, რომ ლაზარე ჯორბენაძე მუდმივად საუბრობდა სიკვდილზე, ჰქონდა დეპრესია. გამოკითხვის ოქმში ჯორბენაძის მეუღლე ამბობს, რომ მას აქვს სამედიცინო დოკუმენტი, სადაც საუბარია შფოთვით აშლილობაზე. გამოკითხვის ოქმში ჯორბენაძის მეუღლე დეტალურად ჰყვება პირად საკითხებზე, რასაც ჩვენ შეგნებულად არ ვასაჯაროებთ, ასევე დეტალურად არის აღწერილი თვითმკვლელობის ფაქტი.

„ჰქონდა აკვიატებული აზრები: ეწყებოდა ტრემორი, ესე იგი ვერ იმორჩილებდა ხელ-ფეხს, იგი იძახდა, რომ ცეცხლი ეკიდებოდა და ახურებდა. ბოლო პერიოდში ლაზარე იყო ძალიან დათრგუნული, ძალიან დეპრესიული. ბოლო 2 თვის განმავლობაში სულ სიკვდილზე ლაპარაკობდა, მას ჰქონდა სუიციდური აზრები, ყოველდღე მე და ლაზარეს გვქონდა საუბარი, ვცდილობდი დამემშვიდებინა და დამეწყნარებინა. ლაზარე აცნობიერებდა, რომ ფსიქოლოგიური აშლილობა ჰქონდა. ეძებდა თავის მოკვლის მეთოდებს. ვერ გამყავდა გარეთ, ხალხთან არ კონტაქტობდა, მხოლოდ ექიმებში დავდიოდით.

მე პრეტენზია არავის მიმართ არ გამაჩნია. მას ჰქონდა ფსიქოლოგიური პრობლემები, რამაც მიიყვანა თვითმკვლელობამდე. მე ყველანაირი სახის დანაშაულს გამოვრიცხავ“, - აღნიშნულია ლაზარე ჯორბენაძის მეუღლის გამოკითხვის ოქმში.