ლევან დარსალია: 2026-2027 წლის ზამთრის სეზონისთვის გუდაურში მნიშვნელოვანი ინფრასტრუქტურული პროექტების განხორციელება იგეგმება

ზამთრის სეზონისთვის აუცილებელია მომზადება ბევრად ადრე დაიწყოს და შესაბამისად, ჩვენც წელს დავიწყეთ საკმაოდ მნიშვნელოვანი ინფრასტრუქტურული პროექტების განხორციელება გუდაურში, - განაცხადა „დღის ქრონიკაში“ მთის ტრასების სააგენტოს დირექტორის მოვალეობის შემსრულებელმა ლევან დარსალიამ.

ლევან დარსალიას თქმით, 2026-2027 წლის ზამთრის სეზონისთვის გუდაურში მნიშვნელოვანი ინფრასტრუქტურული პროექტების განხორციელება იგეგმება.

„წელს ძალიან ბევრი სიახლე ექნება როგორც ადგილობრივ, ისე საერთაშორისო დამსვენებელს. ვამატებთ 7,5 კმ დათოვლიანებას და შესაბამისად, ჯამური დათოვლიანების ტრასების სიგრძე იქნება 12,5 კმ. რაც მოგვცემს იმის საშუალებას, რომ სეზონის გახსნა წინასწარ დავაანონსოთ.

წელს ასევე ავიღეთ გეზი, რომ განვავითაროთ დამწყებთა არეალი, შესაბამისად, სნოუპარკის არეალი, სადაც ვაპირებთ ორი ახალი ბიგელის ტიპის საბაგიროს დადგმას, რომლის ჯამური სიგრძე 1 400 მეტრი იქნება, ასევ იქნება 200-მეტრიანი მოძრავი ხალიჩა, რომელიც ძირითადად ორიენტირებული იქნება უფრო დამწყებებისთვის.

ასევე ვამატებთ 2 ახალ ტრასას, ასევე პოპულარულია ღამის სრიალი და „ახალი გუდაურას“ ტრასის აღჭურვას ვაპირებთ ღამის განათებით“, - აღნიშნა დარსალიამ.