ლევან მაჭავარიანი: ჩვენ გადმოვიბარეთ ქვეყანა, რომელიც დამოკიდებული იყო გარე ძალებზე და წლები დაგვჭირდა იმისთვის, რომ ქვეყანა ამ გავლენისგან გაგვეთავისუფლებინა

სამწუხაროდ, ჩვენ გადმოვიბარეთ ქვეყანა, რომელიც დამოკიდებული იყო გარე ძალებზე და წლები დაგვჭირდა იმისთვის, რომ ქვეყანა ამ გავლენისგან გაგვეთავისუფლებინა, - განაცხადა ფრაქცია „ქართული ოცნების" თავმჯდომარის მოადგილე ლევან მაჭავარიანმა გადაცემაში „ღია ეთერი - დებატები" .

მისივე თქმით, „ქართულმა ოცნებამ“ რთული გზა გამოიარა იმისთვის, რომ ქვეყანაში მშვიდობა და სტაბილურობა შეენარჩუნებინა.

„ჩვენ ძალიან ბევრი გამოვიარეთ და ეს მარტივი გამოსავლელი არ იყო, რაც „ქართული ოცნების" გუნდმა, პირველ რიგში ჩვენმა საპატიო თავმჯდომარემ, „ქართული ოცნების" თითოეულმა ჯარისკაცმა გამოვიარეთ. რამდენი შანტაჟი, წნეხი, ბულინგი, ზეწოლა. იოლი არ არის. ჩვენ ეს ყველაფერი გავაკეთეთ იმისთვის, რომ შეგვენარჩუნებინა მშვიდობა და სტაბილურობა საქართველოში. რა თქმა უნდა, ჩვენ ამას არ გადავუხვევთ. სამწუხაროდ, ჩვენ გადმოვიბარეთ ქვეყანა, რომელიც დამოკიდებული იყო გარე ძალებზე და ჩვენ წლები დაგვჭირდა იმისთვის, რომ ამ გავლენისგან ქვეყანა გაგვეთავისუფლებინა. დღეს, ჩვენი პატრიოტი ქართველები ამაყობენ იმით, რომ ისინი რეალურად ატყობენ, რომ აბსოლუტურად ყველა გადაწყვეტილება ჩვენი ქვეყნის შესახებ მიიღება საქართველოში“, - აღნიშნა მაჭავარიანმა.