ლევან მაჭავარიანი: ის, რაც „ნაცებში“ ვითარდება იმდენად სამარცხვინოა, რომ სერიოზული კომენტარის გაკეთებაც შეუძლებელია, რაც შეეხება ალიანსში განვითარებულ მოვლენებს, ეს არის გარე პატრონებისგან კარგად დაგეგმილი სპექტაკლი

ის, რაც „ნაცებში“ ვითარდება იმდენად სამარცხვინოა, რომ სერიოზული კომენტარის გაკეთებაც შეუძლებელია, რაც შეეხება ალიანსში განვითარებულ მოვლენებს, ეს არის გარე პატრონებისგან კარგად დაგეგმილი სპექტაკლი, - განაცხადა გადაცემაში „იმედი Live” ფრაქცია „ქართული ოცნების“ თავმჯდომარის პირველმა მოადგილე ლევან მაჭავარიანმა ოპოზიციაზე საუბრისას.

მისივე თქმით, „ლელოსა“ და გახარიას პარტიის ალიანსს მიღმა დატოვება ხელოვნური პროცესის ნაწილია.

„ეს არის ხელოვნური პროცესი [ოპოზიციაში დაპირისპირება] ერთი მხრივ და მეორე მხრივ ბუნებრივიც ბევრი რამ ხდება, რადგან აქ არიან ადამიანები, რომლებსაც ერთმანეთი სძულთ. ის, რაც „ნაცებში“ ვითარდება იმდენად სამარცხვინოა, რომ სერიოზული კომენტარის გაკეთებაც შეუძლებელია. „პლინტუს“ ქვემოთ იყვნენ ჩასულები, არ ვიცოდი იმის ქვემოთ თუ კიდევ რაღაც იყო და იმის ქვემოთაც ჩადიან. რაც შეეხება ალიანსში განვითარებულ მოვლენებს, ეს არის გარე პატრონებისგან კარგად დაგეგმილი სპექტაკლი. დატოვეს „ლელო“ და გახარიას პარტია ამ ალიანსს მიღმა, რომ ხელოვნურად მოხდეს ამ ორი პარტიის გამიჯვნა ჩვენი საზოგადოების თვალში კოლექტიური ნაციონალური მოძრაობისგან, ეს არის მათი გარე პატრონების ჩანაფიქრი. ეს გარე პატრონები 14 წლის განმავლობაში ფსონს დებდნენ ერთი და იმავე კონფიგურაციაზე, შემდეგ რაღაც „ახალი“ შემოიტანეს ნიკა გვარამიას თაოსნობით და ისიც ვერ შეასაღეს საზოგადოებას როგორც არანაცები. შესაბამისად ახლა მთლიანად ფსონს დებენ „ლელოზე“ და გახარიას პარტიაზე - უნდათ ბოლომდე ჰყავდეთ ჩვენი საზოგადოების თვალში გამიჯნული კოლექტიური ნაცებისგან“,- განაცხადა ლევან მაჭავარიანმა.