ლევან მაჭავარიანი: საქართველო არის საკვანძო ადგილზე შუა კორიდორში - ევრობიუროკრატებს მოუწევთ გეოგრაფიის აღიარება და იმის თქმა, რომ საქართველოზე გადის მარშრუტი, რომელიც მათთვის სასიცოცხლოდ მნიშვნელოვანია
ფრაქცია „ქართული ოცნების“ თავმჯდომარის პირველმა მოადგილემ ლევან მაჭავარიანმა შუა კორიდორში საქართველოს მნიშვნელობაზე „დღის ქრონიკაში“ ისაუბრა და აღნიშნა, შუა კორიდორში საქართველო საკვანძო ადგილზეა.
მაჭავარიანი ასევე აცხადებს, რომ ევრობიუროკრატებს მოუწევთ იმის აღიარება, რომ მათთვის სასიცოცხლოდ მნიშვნელოვანი მარშრუტი საქართველოზე გადის.
„დღეს შუა კორიდორი არის უალტერნატივო, სადაც საქართველო, აზერბაიჯანთან ერთად არის ხერხემალი. ჩრდილოეთ კორიდორი დაკეტილია, სამხრეთ კორიდორში პრობლემებია და ერთადერთი მარშრუტი, რითიც ჩინეთიდან, შუა აზიის ქვეყნებიდან, ის პროდუქცია და საქონელი, რაც უნდა მიიღოს ევროკავშირმა, ყველაფერმა უნდა გაიაროს საქართველოზე.
ჩვენი ხელისუფლება ყველაფერს აკეთებს, რომ ტვირთის გამტარუნარიანობა იყოს მაქსიმალური და არანაირი დანაკარგი არ იყოს. ამას ემსახურება ავტოსაგზაო მაგისტრალების მშენებლობა, პორტების გაფართოება, ანაკლიის პორტის მშენებლობა, ახალი აეროპორტების მშენებლობა და არსებული აეროპორტების გაფართოება. რკინიგზის მოდერნიზაცია. აქედან გამომდინარე, როგორი გაბუტვის რეჟიმშიც არ უნდა იყვნენ დღეს ევრობიუროკრატები, ხვალ თუ ზეგ, მათ მოუწევთ გეოგრაფიის აღიარება და მოუწევთ იმის თქმა, რომ საქართველოზე გადის ის მარშრუტი, რომელიც მათთვის სასიცოცხლოდ მნიშვნელოვანია და ამ შემთხვევაში, ჩვენს ხელისუფლებასთან საუბარიც მოუწევთ. აქამდე ისინი ყველაფერს აკეთებდნენ იმისთვის, რომ საქართველოში ვასალი ხელისუფლებმა ჰყოლოდათ და ჩვენ აგენტურით ჩავენაცვლებინეთ“, - აღნიშნა ლევან მაჭავარიანმა.
