ლევან მაჭავარიანი: ვიზალიბერალიზაციის საკითხი არის მათი შანტაჟის მექანიზმის მჭიდში ბოლო ტყვია. მე ნამდვილად არ მგონია, რომ იმდენად უგუნურები იყვნენ, რომ ეს ტყვია გაისროლონ. მაშინ უკვე საშანტაჟოც არაფერი რჩება

ვიზალიბერალიზაციის საკითხი არის მათი შანტაჟის მექანიზმის მჭიდში ბოლო ტყვია. მე ნამდვილად არ მგონია, რომ იმდენად უგუნურები იყვნენ, რომ ეს ტყვია გაისროლონ. მაშინ უკვე საშანტაჟოც არაფერი არ რჩება, - განაცხადა „დღის ქრონიკასთან“ ფრაქცია „ქართული ოცნების” თავმჯდომარის პირველმა მოადგილემ ლევან მაჭავარიანმა.

მისი თქმით „ქართული ოცნება“ მიყვება სახელმწიფოს ინტერესებში არსებულ დღის წესრიგს და ევრიბიუროკრატებისთვისვე იქნება მომგებიანი თუ გადახედავენ საკუთარ მიდგომას საქართველოსთან მიმართებაში.

„ჩვენ, ჩვენი დღის წესრიგით ვმოქმედებთ, ვცდილობთ აშშ-თან ურთიერთობები დაიწყოს სუფთა ფურცლიდან. ჩვენ ვაღრმავებთ ურთიერთობებს ჩინეთთან, შუა აზიის ქვეყნებთან იქიდან გამომდინარე, რომ ეს ყველაფერი არის ძალიან სასარგებლო ჩვენი ქვეყნის ეკონომიკური განვითარებისთვის. შუა კორიდორის პროექტის ფარგლებში, რა თქმა უნდა ვაძლიერებთ ჩვენს ინფრასტრუქტურას, იგივე, აეროპორტების გაფართოება, ახალი აეროპორტების მშენებლობა, რკინიგზის მოდერნიზაცია, პორტების გაფართოება, ანაკლიის პორტი და ა.შ. ვინაიდან ჩვენ შუა კორიდორში ყველაზე საკვანძო ადგილი გვიკავია და მაქსიმალურად ეფექტურად უნდა გამოვიყენოთ ეს ყველაფერი. შესაბამისად, ჩვენ, ჩვენს დღის წესრიგს მივყვებით. როდის შეეგუება ევრობიუროკრატია იმას, რომ ვერ ჩაანაცვლეს „ქართული ოცნება“ მიუხედავად მათი ამდენი მცდელობისა, მაგაზეა დამოკიდებული ურთიერთობების შემდგომი განვითარება“, - განაცხადა ლევან მაჭავარიანმა.