ლევან მახაშვილი აშშ-ის იუსტიციის დეპარტამენტის მიერ უცხოური აგენტების რეგისტრაციის კანონის შეხსენებაზე: მივესალმებით ამ კანონმდებლობას და ასეთ მიდგომას ამერიკის შეერთებულ შტატებში და ყველას მოვუწოდებთ, რომ ასევე მხარი დაუჭირონ საქართველოს სახელმწიფოს, როდესაც ცდილობს სახელმწიფოს დაცვას მსგავსი ტიპის ჩარევებისგან

ამერიკის შეერთებული შტატების იუსტიციის დეპარტამენტის მიერ საზოგადოებისთვის შეხსენებას იმ ფედერალური კანონმდებლობის შესახებ, რომელიც ავალდებულებს ფიზიკურ პირებს უცხოურ აგენტებად რეგისტრაციას, როდესაც ისინი აშშ-ის ტერიტორიაზე უცხოური მთავრობის ან უცხოური სუბიექტის მითითებითა თუ კონტროლით მოქმედებენ, თბილისში აფასებენ.

ევროპასთან ინტეგრაციის საპარლამენტო კომიტეტის თავმჯდომარე ლევან მახაშვილი აცხადებს, რომ საქართველო მიესალმება აშშ-ის ასეთ მიდგომას.

„ამერიკის მხრიდან ეს განცხადება არის სრულიად ბუნებრივი. ასეთია ყველა პასუხისმგებლიანი სახელმწიფოს რეაქცია ნებისმიერ მცდელობაზე, რომელიც გულისხმობს უცხო ქვეყნიდან უკანონოდ, კანონების გვერდის ავლით შიდა პოლიტიკაში ჩარევა და საზოგადოების მოსაზრებებზე ზეგავლენის მოხდენას. ამიტომ მივესალმებით ამ კანონმდებლობას და ასეთ მიდგომას ამერიკის შეერთებულ შტატებში და ყველას მოვიწოდებთ, რომ ასევე მიესალმონ და მხარი დაუჭირონ საქართველოს სახელმწიფოს, როდესაც ცდილობს საზოგადოების არჩევანის, სახელმწიფოს დაცვას მსგავსი ტიპის ჩარევებისგან“, - განაცხადა ლევან მახაშვილმა.

აშშ-ის იუსტიციის დეპარტამენტმა განცხადება გამოაქვეყნა, სადაც ნათქვამია, რომ „თუ უცხოური მთავრობა ან უცხოური სუბიექტი ფარულად წარმართავს, აკონტროლებს, აფინანსებს ან კოორდინაციას უწევს თქვენს საქმიანობას აშშ-ში, შეიძლება ამოქმედდეს გამჭვირვალობისა და ინფორმაციის გამჟღავნების ფედერალური კანონები“.