ლევან მახაშვილი ჯო უილსონის განცხადებაზე: ბევრს, ალბათ, აქვს კითხვა: რა უნდა საერთოდ ჯო უილსონს ან, უფრო მეტად, მის უკან მდგომ დამკვეთებს, რომლებიც რეალურად უკვეთენ ამ პოლიტიკურ აქტივობას?

ბევრს, ალბათ, აქვს კითხვა: რა უნდა საერთოდ ჯო უილსონს ან, უფრო მეტად, მის უკან მდგომ დამკვეთებს, რომლებიც რეალურად უკვეთენ ამ პოლიტიკურ აქტივობას?, - ასე ეხმაურება ევროპასთან ინტეგრაციის საპარლამენტო კომიტეტის თავმჯდომარე ლევან მახაშვილი ჯო უილსონის განცხადებას, რომელიც მან სოციალურ ქსელში გამოაქვეყნა.

მისი შეფასებით, ჯო უილსონი სიტყვის თავისუფლებასა და შეურაცხყოფას შორის ზღვარს ვერ ავლებს.

„მას უნდა, რომ საქართველოში, დიახაც, იყოს სიძულვილის ენა და შეურაცხყოფა. ეს იყოს ნორმა ადამიანებსა თუ პოლიტიკოსებს შორის ურთიერთობაში.

დარწმუნებული ვარ, ძალიან კარგად ესმით, რასაც აკეთებს საქართველოს ხელისუფლება; რომ ჩვენი ძალისხმევა მიმართულია იმისკენ, რომ პოლარიზაცია შემცირდეს და სიძულვილის ენა ნორმა აღარ იყოს.

ჩვენ აქ საუბარი გვაქვს სიძულვილის ენაზე, შეურაცხყოფების თავიდან არიდებაზე და არა სიტყვის თავისუფლებაზე, საკუთარი პოზიციების გამოხატვაზე, ფიქრზე, ანალიზსა და დისკუსიაზე.

სწორედ ეს ძალები იყვნენ ისინი, ვინც დაამკვიდრეს და ნორმად აქციეს სიძულვილი ქართულ პოლიტიკაში, რამაც, საბოლოო ჯამში, საფუძველი ჩაუყარა პოლარიზაციასა და რადიკალიზაციას.

საბედნიეროდ, საქართველოს მოსახლეობის მხარდაჭერითა და პირდაპირი დაკვეთით, მათ ამ ამერიკული ოცნების ასრულება არ უწერია“, - განაცხადა ლევან მახაშვილმა.

უილსონმა სოციალურ ქსელში დაწერა, რომ „ქართული ოცნება“ სიტყვის თავისუფლებას ანადგურებს. კონგრესმენი კანონპროექტზე მუშაობს, რომელიც, მისი თქმით, წინააღმდეგობას გაუწევს „ვოუქ ცენზურას“.