ლევან მახაშვილი შაჰინის განცხადებაზე: რაც არ უნდა კარგი სურვილები და ოცნებები ჰქონდეთ, ისინი უბრალოდ ოცნებებად და სურვილებად რჩება და როდესაც საქმე საქმეზე მიდგება, ეს გეოპოლიტიკური თამაშები, სამწუხაროდ, ზოგჯერ უბრალოდ გადაყლაპავს ხოლმე ზოგიერთ სახელმწიფოს

ლევან მახაშვილი ამერიკელი სენატორის, ჯინ შაჰინის განცხადებას გამოეხმაურა, რომელმაც აღნიშნა, რომ უკრაინაში რუსეთის წარმატება დააზიანებს ამერიკის სტრატეგიულ ინტერესებს და გააძლიერებს ჩინეთის ინტერესებს. პარლამენტის ევროპასთან ინტეგრაციის კომიტეტის თავმჯდომარე ამ კუთხით გეოპოლიტიკური რეალობის აღქმის მნიშვნელობას უსვამს ხაზს და ანიშნავს, რომ საქართველომ საკუთარი შესაძლებლობებიდან და ინტერესებიდან გამომდინარე უნდა იმოქმედოს.

რაც არ უნდა კარგი სურვილები ჰქონდეთ, რაც არ უნდა კარგი ოცნებები ჰქონდეთ, ეს ოცნებები და სურვილები უბრალოდ ოცნებებად და სურვილებად რჩება და როდესაც საქმე საქმეზე მიდგება, ეს გეოპოლიტიკური თამაშები, სამწუხაროდ, ზოგჯერ უბრალოდ გადაყლაპავს ხოლმე ზოგიერთ სახელმწიფოს და საერთოდ გაანადგურებს ხოლმე სახელმწიფოს. ამას ვაკვირდებით ჩვენ უკრაინის მაგალითზე და ეს იყო ალბათ მთავარი გაკვეთილი და დასკვნა, რაც ყველამ უნდა გამოვიტანოთ, რომ ლამაზ სიტყვებს კი არ უნდა დავუჯეროთ, ოცნებებით კი არ უნდა გაგვაბრუოს ვინმემ, არამედ უნდა შევხედოთ, რა არის რეალობა, რა შესაძლებლობები აქვს საქართველოს და აი რეალობიდან და ჩვენი ინტერესებიდან გამომდინარე ფრთხილად, მოზომილად გადავდგათ ნაბიჯები“, - მიიჩნევს მახაშვილი.

აშშ-ის კონგრესის „დემოკრატი“ სენატორის ჯინ შაჰინის განცხადებით, უკრაინაში ომი ისე უნდა დასრულდეს, რომ შეერთებული შტატებისთვის სასარგებლო იყოს.