ლევან მოსეშვილი: ქუთაისის საერთაშორისო აეროპორტმა ჩვენი რეგიონი მსოფლიოსთან კიდევ უფრო დააახლოვა და მნიშვნელოვანი წვლილი შეიტანა იმერეთის ტურისტული პოტენციალის განვითარებაში

ქუთაისის საერთაშორისო აეროპორტის 14 წლისთავისა და Wizz Air-ის ბაზის 10 წლის იუბილესადმი მიძღვნილ ღონისძიებაზე საქართველოს აეროპორტების გაერთიანების გენერალურმა დირექტორმა, ლევან მოსეშვილმა, აეროპორტის როლზე ქუთაისისა და იმერეთის რეგიონის განვითარებაში ისაუბრა.

მისი თქმით, აეროპორტის განვითარება მხოლოდ ავიაციის განვითარებას არ გულისხმობს და ის ქუთაისისა და მთლიანად იმერეთის განვითარების ნაწილია.

„აეროპორტი მხოლოდ ინფრასტრუქტურა არ არის, ეს ადამიანების დამაკავშირებელი სივრცეა, რადგან თითოეული მგზავრი ერთი კონკრეტული ისტორიაა. სწორედ ამიტომ, ქუთაისის საერთაშორისო აეროპორტის განვითარება მხოლოდ ავიაციის განვითარება არ არის. ეს არის ქუთაისისა და იმერეთის განვითარების ნაწილიც“, - აღნიშნა მოსეშვილმა.

მისივე თქმით, საერთაშორისო მგზავრის მოგზაურობა აეროპორტში არ სრულდება და ის ქუთაისში, იმერეთის სხვადასხვა მუნიციპალიტეტში, სასტუმროებში, რესტორნებსა და ტურისტულ ობიექტებში გადაადგილდება.

„ქუთაისის საერთაშორისო აეროპორტი დღეს მხოლოდ მგზავრების მიღებისა და გაცილების ადგილი აღარ არის. ის რეგიონის ეკონომიკურ და ტურისტულ განვითარებაში მნიშვნელოვან როლს ასრულებს“, - განაცხადა ლევან მოსეშვილმა.

მისივე თქმით, დღეს ქუთაისის საერთაშორისო აეროპორტიდან 6 ავიაკომპანია 16 ქვეყნის 32 მიმართულებით ოპერირებს, მათგან 25 ევროპული მიმართულებაა.